АНУ-ын Миннеаполис хотод одоогоос жил орчмын өмнө Жорж Флойд гэх өнгөт арьст иргэн цагдаагийн ажилтны гарт амиа алдсан. Уг хэрэг дэлхий даяар арьс өнгөөр ялгаварлан гадуурхалтыг эсэргүүцсэн Black Lives Matter хөдөлгөөнийг эхлүүлж, гэм буруутай этгээдүүдийн шүүх хурал үргэлжилж байна.

Тус хотод өнгөрсөн ням гарагт дахин нэг өнгөт арьст иргэн цагдаагийн ажилтны бууны суманд оногдож, улмаар авто осолд орж нас барсан. Энэ явдлын дараа Миннеаполис хотын иргэд жагсаалд нэгдсэн байна. Олон зуун иргэн хотын Брүклин төвд цуглаж жагссан ба хэв журам сахиулах цагдаа нартай мөргөлджээ.

Цагдаа нар жагсагчдын эсрэг нулимс асгаруулагч цацсан бөгөөд цагдаагийн хоёр машин руу жагсагчид чулуу шидэж, дээр нь гарч үсрэх зэргээр эсэргүүцэл үзүүлсэн байна. Миннесота мужийн захирагч Тим Уольц нөхцөл байдлыг ойроос ажиглахын сацуу нас барсан иргэний ар гэрт гүн эмгэнэл илэрхийлье гэжээ.

Цагдаагийн ажилтны бууны суманд оногдож нас барсан иргэн 20 настай Даунте Врайт болохыг тогтоосон. Түүнийг ням гарагийн үд дундын үед зам тээврийн хөдөлгөөний дүрэм зөрчсөн гэж үзэн Брүклин төвийн цагдаагийн ажилтан машинаас нь татаж буулгасан байна. Энэ үед цагдаагийн ажилтанд Врайтыг баривчлан саатуулах зөвшөөрөл байгаагүй ажээ. Түүнийг баривчлахыг оролдох үед машиндаа буцаж суун, замын хөдөлгөөнд үргэлжлүүлэн оролцсон байна. Хэдэн блок явсны дараа цагдаагийн офицер гал нээж, улмаар өөр нэг машинтай мөргөлдөж ослын газарт нас баржээ.

Эх сурвалж: ВВС  

---