Мьянмарын армийн ахмадын туслахыг хөнөөсөн хэрэгт холбогдсон 19 иргэнд цаазаар авах ял оноосон гэж цэргийн мэдлийн "Myawaddy" телевиз мэдээлжээ. Энэ нь өнгөрөгч 2 дугаар сарын 1-нд болсон төрийн эргэлтээс хойш олон нийтэд зарласан анхны ийм төрлийн шийтгэл юм.

Хэрэг 3 дугаар сарын 27-ны өдөр Мьянмарын хамгийн том хот болох Янгоны Хойд Оккалапа дүүрэгт болсон байна. Тус дүүрэгт цэргийн онц байдал зарласан бөгөөд цэргийн шүүх ял оноох боломжтой болоод байгаа аж.

Засгийн газрыг унаган, төрийн эрхийг гартаа авсан цэргийн удирдагчид хоёр жилийн дотор сонгууль зохион байгуулна гэж мэдэгдсэн бөгөөд Мьянмарын иргэд энх тайвныг хүсэж байгаа учир эсэргүүцлийн жагсаалын хүрээ улам бүр багасаж байгаа хэмээн тэмдэглэжээ. Мөн тус улсын цэргийн хунтын төлөөлөгч, бригадын генерал Зав Мин Тун Мьянмар улс удалгүй хэвийн байдалд орж, Засгийн газрын яамд болон банкнууд бүрэн ажиллаж эхэлнэ гэж мэдээлсэн байна.

Гэвч тус улс даяарх эсэргүүцлийн хөдөлгөөн тууштай үргэлжилсээр байгаа юм. Цэргүүд өнгөрсөн долоо хоногийн баасан гарагт Баго хотын жагсагчид руу гранат харван, дор хаяж 10 хүнийг хөнөөг, хохирогчдын цогцсыг ойролцоох суварга дотор овоолсон байна. Мьянмарт төрийн эргэлт гарснаас хойш 614 хүн аюулгүй байдлын хүчнийхний гарт амь үрэгдсэн бөгөөд тэдний 48 нь насанд хүрээгүй хүүхэд байжээ. Түүнчлэн одоогийн байдлаар нийт 2,800 гаруй хүнийг цагдан хориод байна.

Эх сурвалж: CNN

---