БНХАУ-ын Синовак хувийн фирм болон Синофарм төрийн мэдлийн компанийн үйлдвэрлэсэн вакциныг манай Монгол улсаас авахуулаад Мексик, Турк, Индонези зэрэг арав гаруй улс ард иргэдээ коронавирусийн эсрэг дархлаажуулахад ашиглаж байна.

Хятадын Засгийн газар өөрсдийн дотооддоо үйлдвэрлэсэн вакциныг өндөр үр дүнтэй гэж хамгаалж байсан ч эрүүл мэндийн салбарын өндөр дээд албан тушаалтан анх удаа вакцины үр дүн сул байгаа талаар мэдээлжээ. Хятадын Халдварт өвчний хяналтын төвийн захирал Гао Фу өнгөрсөн бямба гарагт Ченду хотод хийсэн хэвлэлийн бага хурал дээр “хятад вакцинууд өндөр хамгаалалттай байж чадахгүй байгаа бөгөөд өөр технологиор бүтээсэн вакцинуудыг ашиглах талаар албан ёсоор хэлэлцэж эхэлсэн” хэмээн мэдэгдсэн байна.

Энэ нь Хятадын эрх баригчид вакциныхаа үр дүнд эргэлзэж эхэлсэн ба өөр төрлийн вакцинуудтай хольж, чанарыг нь сайжруулах тухай яригдаж байгаа гэсэн үг юм. Хятадын мэргэжилтнүүд АНУ-ын Пфайзер болон ХБНГУ-ын БиоНТек фирмүүдийн хамтран ажилласан mRNA вакцин гаргаж авах генетикийн шинэ технологийг судалж байна. Өнгөрсөн амралтын өдөр болсон хэвлэлийн хурал дээр албаны хүн Ван Хуачин mRNA технологи дээр суурилсан вакцины туршилт клиникийн түвшинд явагдаж байгаа гэжээ.

Дэлхийн бусад улс орнуудын хувьд ч вакцины чанар, дархлаажуулах үр нөлөө, чадамжийг сайжруулахын тулд хооронд нь хольж нийлэгжүүлэх туршилтыг эхлүүлсэн байна. Тухайлбал Британийн судлаачид Пфайзер/БиоНТек-ийн вакциныг уламжлалт аргаар үйлдвэрлэсэн АстраЗенекатай нийлэгжүүлэх боломжтой эсэхийг судалж байгаа юм.

Бразилд явуулсан туршилтаар БНХАУ-д үйлдвэрлэсэн вакциныг  50 хувийн үр дүнтэй гэж зарласан ч энэ нь туршилт явуулсан иргэдийн нас, эрүүл мэндийн байдал, дархлаанаас шалтгаалан харилцан адилгүй байж болох юм. Одоогоор Хятадад гадны ямар нэг вакцин ашиглаагүй ба энэ сарын 2-ны өдрийн байдлаар тус улсын 34 сая иргэн вакцины хоёр тун, 65 сая иргэн нэг тунг тариулаад байна.

Эх сурвалж: ABC News

---