Найман сартай жирэмсэн тамирчин Аминат Идрис Нигерийн Үндэсний спортын их наадамд оролцон, таеквондогийн "Пүмсэ" буюу тоот дасгалын төрөлд алтан медаль хүртжээ.

26 настай Идрис таеквондогийн Холимог Пүмсэ ангилалд түрүүлэн, алтан медаль хүртсэнийг тэмцээний зохион байгуулагчид мэдэгдэн, түүний амжилтыг "Урам зориг хайрласан явдал" хэмээн тэмдэглэжээ. Тэрээр таеквондогийн тулааны бус тоот дасгалын төрөлд өрсөлдөж, байлдааны арга техник болон уян хатан байдлыг харуулсан дасгалуудыг чадварлагаар хийж гүйцэтгэсэн байна.

Идрис өөрийн гаргасан амжилтдаа үнэхээр их баяртай байгаагаа "CNN" агентлагт ярьжээ. Тэрээр "Энэ бол миний хувьд маш онцгой завшаан байсан. Би хэд хэдэн удаа бэлтгэл хийснийхээ дараа тэмцээнд оролцоод үзэхээр шийдсэн ... Алтан медаль авах үнэхээр сайхан санагдаж байна. Би жирэмсэн болохоосоо өмнө үргэлж бэлтгэл хийдэг байсан тул ямар ч ялгаагүй санагдсан" гэсэн юм.

An inspiring outing by heavily pregnant Aminat Idrees who won a gold medal for Lagos at the ongoing National Sports Festival in Benin, Edo State.

Aminat Idrees who is 8 months pregnant won gold in the Mixed Poomsae category in Taekwondo pic.twitter.com/rr4fxJCfMs

— National Sports Festival 2020 (@nsf_edo) April 5, 2021

Түүнийг жирэмсэн үедээ спортын тэмцээнд оролцож, эрсдэл үүсгэсэн гэж зарим хүмүүс шүүмжилж байсан бол бусад нь түүнийг өмөөрөн, дэмжсэн юм. Идрис эдгээр шүүмжлэлийн талаар "Олон хүмүүс таеквондогийн мөн чанарыг ойлгодоггүй. Таеквондо нь хоёр салбартай: тулааны спорт ба Пүмсэ. Пүмсэ бол дасгалын нэг хэлбэр юм ... зүгээр л таеквондогийн гар, хөлийн техникийг харуулж байгаа хэрэг. Энэ төрөл эрсдэл багатай учир би туршаад үзье гэж бодсон. Миний эмч болон спортын наадмын зохион байгуулагчид намайг тэмцээнд оролцох чадвартай гэж дүгнэн, зөвшөөрөл олгосон" хэмээн онцолжээ.

Эх сурвалж: CNN

---