Их Британийн хатан хаан хоёрдугаар Элизабетийн 73 жил ханилсан нөхөр Эдинбургийн гүн ханхүү Филип өнгөрсөн долоо хоногийн баасан гарагт таалал төгссөн билээ. Түүнийг алсын замд нь ёс төртэйгээр үдэх арга хэмжээг энэ долоо хоногийн бямба гарагт зохион байгуулахаар төлөвлөж байна.

Зуун насныхаа босгон дээр буюу зуу нас хүрэхээсээ ердөө хоёр сарын өмнө ханхүү Филип Виндсор шилтгээнд тайван нойрссон бөгөөд түүний шарилыг оршуулах ёслол хүртэл энд байлгахаар болжээ. Ханхүү Филипийн хүү ханхүү Эндрю ням гарагт хатан хаан Элизабет нөхрөө алдсанаар амьдралд нь нөхөж баршгүй маш том хоосон орон зай үлдсэн хэмээн өгүүлснийг олон нийтэд дамжуулсан байна.

Йоркийн гүн Эндрю “хэнээс ч илүү гашуудаж шаналж, хоосон орон зайг мэдэрч байгаа ээжийгээ өрөвдөж, дэмжихийг хүсч байна” гэжээ. Тэрээр үргэлжлүүлэн “тэр гайхалтай сайхан эр хүн байсан. Би түүнийг маш их хайрладаг. Ямар нэг асуудал тулгарвал хамгийн түрүүнд тэр санаа тавих байсан” хэмээн дурсжээ.

Ханхүү Филипийг насан эцэслэсэн тухай мэдээ түгсний дараа дэлхийн удирдагчид, үе үеийн төр засгийн тэргүүнүүд, Их Британи даяар эмгэнэл илэрхийлсээр байна. Тэрээр үндэсний эцэг мэт хайрлагдахаас гадна хамгийн удаан хугацаанд хатан хааны арыг даасан түшиг тулгуур, нөхөр юм. Хатан хаан “тэр намайг хэзээ ч ичгэвэртэй байдалд оруулж байгаагүй, үргэлж намайг дэмждэг маш сайн хамтрагч” хэмээн нэгэнтээ өгүүлсэн байдаг.

Энэ долоо хоногийн бямба гарагт болох оршуулганд хатан хааны гэр бүлийн бүх гишүүд төдийгүй бусад нөлөө бүхий хүмүүс оролцоно. Түүний зээ хөвгүүдийн нэг ханхүү Харри эхнэр Меган Мэрклийн хамт АНУ-д амьдарч байгаа. Харри өвөөгийнхөө оршуулганд ирж оролцох ч түүний бие давхар эхнэр Меганыг эмч нар хол аялахгүй байхыг зөвлөсөн тул тэрээр ирж оролцохгүй гэдгийг Виндсор шилтгээнээс мэдэгджээ.

Эх сурвалж: CNN

---