Аугаа Эх орны дайны ялалтын 76 жилийн ойг тохиолдуулан ирэх 5 дугаар сарын 9-ний өдөр зохион байгуулагдах цэргийн парадад гадаадын зочдыг урихгүй гэж ОХУ-ын Ерөнхийлөгчийн хэвлэлийн төлөөлөгч Дмитрий Песков мэдэгджээ.

Энэ жилийн Ялалтын баярын жагсаалд гадаадын удирдагчдыг урих эсэх талаар асуусан сэтгүүлчийн асуултад тэрээр "Үгүй ээ. Энэ жил бол баяр ёслолын жил биш. Гадаадын зочдыг урихгүй. Харин бусад зочдын хувьд тэднийг ердийн журмын дагуу урих болно. Гэхдээ арга хэмжээ ойртох үед манай эрүүл мэндийн аюулгүй байдлыг хангах албаны хүмүүс зарим хязгаарлалтыг тодорхойлж магадгүй" хэмээн хариулсан байна.

Ялалтын баярын 76 жилийн ойн баярын жагсаалд 12 мянган хүн, 190 цэргийн хэрэгсэл, 53 онгоц болон 23 нисдэг тэрэг оролцоно гэх мэдээлэл өмнө нь ил болоод байсан билээ. Тус улсын Батлан хамгаалахын сайд Сергей Шойгу парадын бэлтгэл болон үндсэн арга хэмжээний үеэр цэргийн ангиудыг коронавирусийн халдвараас урьдчилан сэргийлэхийг уриалсан юм. Жагсаалын эхний бэлтгэл өнгөрөгч 3 дугаар сарын 31-нд Москва хотноо болжээ.

Эх сурвалж: TASS

---