Жото япон хэлний сургуулийн 2021 оны төгсөгч Х.Баасанхүү нь хэлний сургуулиа
амжилттай төгсөөд Нагасакигийн улсын их сургуулийн магистрт амжилттай элсэн
суралцахаар болсон. Бид түүнтэй Япон улсад хэрхэн амжилттай суралцах боломж манай залуучуудад хэр байна гэх талаар товчхон ярилцлаа.

-Сайн байна уу. Юуны өмнө сургуулиа амжилттай төгссөнд нь баяр хүргэе. Өөрийгөө товч танилцуулахгүй юу.

-Намайг урьж оролцуулсанд баярлалаа. Намайг Хишигбадрахын Баасанхүү гэдэг. ШУТИС-ийг төгссөн. Инженер мэргэжилтэй. Японы Токио хотод байдаг “Жото” япон хэлний сургуульд нэг жил зургаан сар суралцаж төгсөөд Нагасакигийн улсын их сургуульд дэвшин суралцахаар болоод байна.

-Японд суралцах ямар байна вэ. Японд сурахаар төлөвлөж байгаа оюутнуудад хэлэх зүйл юу байна вэ?

-Японд байх хугацаандаа хэрхэн амжилттай суралцах, ажил сургуулиа амжуулах нь хувь хүний хувийн зохион байгуулалтаас шалтгаалдаг. Өөрийнхөө зорилгын төлөө хичээл зүтгэл гаргаад явж байгаа маш олон монгол залуучууд байгаа. Би тэдний л нэг төлөөлөл болов уу гэж дотроо бодож байна. Миний хувьд Нагасакигийн их сургуульд дэвшин суралцахаар болоод бичиг баримтаа бүрдүүлээд, сургууль руугаа нүүхээр төлөвлөөд байж байна.

-Японы аж амьдрал, японд сурангаа ажиллаж буй оюутнуудын нэг сар хэрхэн өнгөрдөг вэ? Тэр талаар сонирхуулаач.

-Японд маш завгүй, нийгэм нь өөрөө маш өртөг өндөртэй учраас зайлшгүй ажиллах ёстой болдог. Хичээлээ ч хийх ёстой ажлаа ч хийх ёстой болдог. Японы хэлний сургуулиудын хувьд өглөөний анги, өдрийн анги гэж байдаг. Би бол өдрийн ангид нь явдаг. Өдрийн ангийн япон хэлний хичээлээ дууссаны дараа ангидаа үлдээд даалгавраа үргэжлүүлэн хийгээд мөн сурахаар бэлдэж байгаа инженерийн чиглэлээр судалгаа хийж, англи хэлээ ч бас давтдаг.
Түүний дараагаар 19:00 цагт гэртээ харьж хоолоо хийж идчээд 20:20 гээд ажил руугаа гардаг. Ажил маань орой 22:00 цагаас үүрийн 6:00 цаг хүртэл ажилладаг. Хичээл ажил гээд бүх л зүйлээ амжуулахгүй бол болохгүй. Нэгэнт л японд очсон бол ажил хичээл аль алинг нь амжуулахын төлөө чармайх хэрэгтэй. Тэгж байж л бид хоолоо олж иднэ. Бид амьдралаа сайжруулахын тулд ажиллах хэрэгтэй гэдгийг маш сайн ойлгосон.

Японд ирснээр монгол оюутнууд маань маш их ачаалал даадаг болж байна.
Бид монголд байхдаа өө ядарлаа гээд л хэвтээд өгдөг байсан бол японд хийх ёстой юмаа хийхээс өөр аргагүй учраас ачаалал даах чадварт суралцсан, туршлагатай болсон юм шиг санагддаг.

-Гадагшаа явахаасаа өмнө хэлээ хэр бэлдсэн бэ. Монгол залуучууд очиж байгаад л сурчихна гэж бодоод байдаг. Энэ талаар юу гэж бодож байна?

-Тиймээ. Хүмүүс бодохдоо гадаадад очсон л бол хэлийг нь сурчихна гэж боддог. Энэ бол туйлын буруу ойлголт. Хэдий гадаадад
ирсэн ч гэсэн хэлийг нь сураагүй хүмүүс зөндөө байдаг. Монголд хэлээ сураад бэлдээд ирвэл ядаж цагийн ажил хийх, бусад хүмүүстэй харилцах гээд олон зүйлд дээр давуу тал үүсдэг. Ажиглаад байхад монголдоо хэлээ сайн давтаад ирсэн хүүхэд илүү хурдан сайжирч байгаа нь харагдсан. Гадаад хэлийг заавал Японд эсвэл Америкт очсон хойноо сурна гэх биш, монголдоо сайн сураад, хичээл зүтгэл гаргаад сураад гадаадад очвол илүү их боломж гарна.

Монголдоо хэлийг сайн сурсан оюутан гарцаагүй ялгардаг, амжилттай явдаг гэдгийг харсан. Тиймээс монголдоо сайн бэлдэж байгаад яваарай гэж хэлмээр байна.

-Магистрт, докторт тэнцэх тийм ч амар биш шүү дээ. Тэгэхээр өөрөө яг туулаад амжилттай ажлаад сураад явж байгаа оюутан хүний хувьд японд сурахаар зэхэж буй оюутнуудад юу гэж хэлэх вэ?

-Бид эхлээд зорилгоо тодорхойлох хэрэгтэй юм шиг. Зорилгогүй хүн юу хийх яахаа мэдэхгүй шүү дээ. Чи яг японд очоод сурах юм уу ажиллах юм уу? Ажиллавал хаана ямар ажил хийх юм гэх мэт. Хэрэв тэгж судалж чадвал маш их цаг хэмнэнэ. Миний хувьд одоо сурахаар сонгосон сургуулиа бол монголд байхдаа судлаагүй юм. Энд ирснийхээ дараагаар маш олон сургуулиуд руу цахим шуудан илгээнэ, хариу хүлээнэ.

Энэ сургуулийн шаардлага нь юу юм,  миний хэлний мэдлэг хэр билээ,  ямар хэл дээр хичээлээ үзэх юм, ажлын туршлага шаардах уу гэх мэт. Тэр шаардлагуудад миний түвшин нийцэж байна уу гэдгийг сайтар харах ёстой бас түүнд өөрийгөө нийцүүлэн бэлдэх хэрэгтэй.

Хэрэв сурахгүй ажиллахаар ирэх гэж байгаа бол яг хаана ажиллах вэ гэдгээ тодорхой болгоод ирэхгүй бол ирсэн хойноо шантрах, нутаг буцах гэх мэт асуудал анзаарагддаг.

Тиймээс интернет таны гарт байгаа учраас судалгаагаа сайн хийгээд зорилгоо сайн тодорхойлоод ирвэл хүссэн зорилгодоо хүрч чадна гэж бодож байна.

Монгол хүмүүсийн нэг нийтлэг зан байдаг нь хүнд найддаг. Болох байлгүй дээ гэж хэн нэгэнд найддаг. Тэр бол байж боломгүй зүйл. Чиний зорилгын төлөө чи л явах учраас өөрөө сайн хичээж хичээл зүтгэл гаргах хэрэгтэй. Мэдээж монгол оюутнууд маш мундаг л даа. Гэхдээ жижигхэн зүйл тулгарахад за за би угаасаа чадахгүй юм байна, би угаасаа бүтэхгүй байх оо гээд буугаад өгчихдөг оюутнууд бас байна. Тийм болохоор өөртөө маш итгэлтэй байгаад өөртөө төлөвлөгөө гаргаад түүнийхээ дагуу хийгээд явахад боломжгүй зүйл гэж байхгүй гэж бодож байна. Хэрэв боломж байхгүй байвал боломжийг өөртөө гаргах хэрэгтэй. Хэзээ ч хүнд найдаж болохүй. Өөрөө одооноос сайн судал, эрж хайгаарай.

-Монголдоо байхдаа энэ зүйлээ жаахан бэлдсэн бол илүү боломж гарах байж дээ гэж бодогдох зүйл байсан уу?

-Байгаа. Зөвхөн японд гэлтгүй, гадаадад амьдарч байгаа хүнд тухайн орных нь хэлийг сурах нь ажиллаж байна уу, сурч байна уу гэдгээс үл хамаараад маш чухал байдаг юм байна. Нэгэнт л тэр улсад ажиллаж амьдарч байгаа учраас хүнтэй харилцахаас эхлүүлээд маш чухалд тавигддаг зүйл бол хэл байдаг. Миний хувьд япон хэлийг жаахан эртхэн үзэж эхэлдэг байж дээ, оюутан байхаасаа үзээд эхэлсэн бол илүү боломж гарах байжээ. Хэрэв ханзаа жаахан эртхэн үзээд, япон хэлээ илүү жаахан сурсан бол доо гэж бодсон. Магадгүй Монголдоо байхдаа сургуулиа судалсан бол илүү сайн сургуульд орох байж дээ гэж бодогдсон. Мэдээж миний одоо дэвшин суралцахаар болсон Нагасакигийн их сургууль бол том сургууль, сайн сургууль. Энэ сургуульдаа элсэн орохоор болсондоо баяртай байгаа.

-Японд 2 жил байх, Монголд 2 жил байх аль нь илүү үр дүнтэй гэж үзэх вэ?

-Миний хувьд монголдоо байсан ч гэсэн үр бүтээлтэй байх байсан гэж бодож байна. (инээв) Ажил маань байна, хийх зүйл олон байгаа учраас. Харин японд байснаар ачаалал дааж сурч байна. Орой ажил тарж ирээд л өө би ядарч байна гээд л унтдаг ч юм уу. Японд бол шөнө ажилласан ч гэсэн өдөр нь хичээлдээ явдаг. Ядаж л ачаалал авч сурлаа, шөнөөр ажиллаж сурлаа, хамт амьдарч байгаа хүмүүстэйгээ харилцан ойлголцож сурах, цаг барих, бусдыг хүндлэх мэндлэх гээд олон зүйлд суралцаж байна. Манай монголчуудын хувьд цаг барьж сурах нь маш чухал зүйл шүү дээ. Юм үзэж нүд тайлан гэдэг шиг олон юм сурч, олж харсан. Мөн дэвшин суралцахаар болоод улсын сургуульд тэтгэлэгээр суралцах болсондоо маш их баяртай байна. Энэ хугацаанд манай сургуулийн багш нар маш их тусалсан. Түүнд нь маш их талархаж байгаа. Манай Жото япон хэлний сургуульд Соёлоо гээд монгол мэргэжилтэн ажилладаг болохоор зааж зөвлөх, туслах гээд маш том давуу тал болдог. Мөн монгол дахь Жотогийн салбар сургуулийн захирал Асами багш ч гэсэн сургууль руу хүсэлт гаргахад тусалж өгсөн. Монгол ажилтан байдаг болохоор ямар нэг асуудал тулгарахад туслахад бэлэн байдаг нь маш амар байдаг.
Монгол оюутнууддаа хандаж хэлэхэд зорилготой байж, зорьсондоо хүрэхэд болохгүй юм байхгүй шүү. Боломжгүй зүйл гэж байхгүй шүү.

-Ярилцсанд маш их баярлалаа. Эцэст нь хэлэх зүйл байна уу?

-Зорилгоо тодорхойлоод, санаачлагатай байж чадвал бүх юм нээлттэй, боломжтой шүү. Хичээж байгаа хүнд япон орон бол маш буянтай сайхан орон. Япон руу сурах, ажиллахаар ирж буй хэн ч хичээх юм бол ганзага хоосон буцахгүй шүү л гэж хэлье дээ.

Жото япон хэлний сургуулийн монгол дахь албан ёсны төлөөлөгч, Жото Эдүкэшн Центр Утас: 99682226
Facebook: Жото Эдүкэшн Центр

 

 

---