С.Зориг агсны амь насыг хөнөөсөн хэрэг холбогдсон Т.Чимгээгийн төрсөн ах Т.Хүрэлбат дүүг нь суллах хүртэл өлсгөлөн зарлаж, Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд Л.Оюун-Эрдэнэ нар гэрээслэл үлдээж, Еөнхийлөгчид шаардлага хүргүүлэв.

Тэрбээр өөрийн дүү Т.Чимгээг суллах хүртэл амь насаа дэнчин тавин Хэлмэгдэгсдийн хөшөөний урд өлсгөлөн зарлаж буйгаа мэдэгдэв. Хэрэв түүний амь нас эрсэдвэл ТЕГ-ын дарга асан Б.Хурц хариуцлага хүлээх болно гэсэн утга бүхий гэрээслэлийг Үндэсний аюулгүй байдлын зөвлөлд хүргүүлж буйгаа мэдэгдлээ.

Түүнчлэн Т.Чимгээгийн гэр бүлийн зүгээс Ерөнхийлөгч Х.Баттулгад шаардлага хүргүүлсэн юм. Шаардлагад Т.Чимгээг ёс бусаар доромжилж, шүүсэн бусармаг үйлдлийг зогсоох нь Ерөнхийлөгчийг үүрэг юм. Энэ бүх үйлдлийг Ерөнхийлөгч таслан зогсоох хэрэгтэй гэж гэр бүлийн зүгээс үзэж байна.

Т.Чимгээгийн ах Т.Хүрэлбат "Хэн ч харсан зодож, дарамталж байгаа нь тодорхой байсан учраас шийдчих байх гэж хоёр жил хүлээлээ. Дүүгийн маань амь нас, эрүүл мэнд өдрөөс өдөрт доройтож байна. Тийм учраас тэмцлийн ийм хэлбэрийг сонгож байна.

Ерөнхий сайдыг гуравдугаар сарын 8-ны өдөр очиж уулзахаас өмнө би нэг удаа очиж уулзсан. Тухайн үед Чимгээ маань "Ах аа, би гармаар байна" л гээд байсан. Хүний ах байх хамгийн хэцүү нь тэр юм . Даанч надад гаргаад авах эрх мэдэл байхгүй. Би хуулийг хүндэтгэж зургаан жил дүүгээ шоронд хориуллаа. Одоо надад энэ тэмцлээс өөр ямар ч сонголт үлдсэнгүй. Би өнөөдрөөс эхлээд эцсээ хүртэл амь насаа дэнчин тавиад өлсгөлөн зарлана.

С.Зоригийн хэрэгт гэж гүтгэж хорьсон гурван шүүгч өнөөдөр ажлаа хийгээд бидний татварын мөнгөөр цалингаа аваад явж байна.  Миний ээж 80 хүрч байна. Энэ хөгшнийг амьд байлгах гэж би дандаа худлаа хэлж байсан. Сайд очиж уулзлаа, одоо л гаргачих байх, УИХ-ын очлоо, одоо л суллачих байх гээд олон жил хүлээлээ" гэв.

---