Нүдний даралт ихдэх өвчин буюу глауком бол нүдний хамгийн түгээмэл өвчний нэг. Дэлхий даяар хүн сохор болох хоёр дахь үндсэн шалтгаан болдог. Эхнийх нь болор цайх, хоёр дахь нь глаукома. Болор цайх нь харьцангуй гайгүй. Болрыг солиод эргээд юм хардаг болдог. Гэтэл глаукома өөр онцлогтой. Цагийг нь олж зөв эмчилгээ хийхгүй бол бүр сохроод эргэлтгүй болох тохиолдол маш элбэг. Настай хүмүүст ихэвчлэн тохиолддог ч залуучуудад бас тохиолддог.

Тэгвэл “Гэрэл” нүдний эмнэлгийн хувьд энэ сарын 14-ныг дуустал 40-ээс дээш настай хүмүүст зориулан урьдчилан сэргийлэх үзлэгийг үнэ төлбөргүй болгожээ.

“Гэрэл” нүдний эмнэлгийн эмч Э.Сарангэрэл: Нүдний даралт Монгол хүмүүст түгээмэл тохиолддог өвчин. Дэлхий даяар 40-өөс дээш насанд 200 хүн тутмын нэг нь 80-аас дээш насанд 8 хүн тутмын нэг нь нүдний даралттай байдаг. Нүдний даралт нь ямар нэгэн шинж тэмдэг илэрдэггүй тул 40-өөс дээш настай хүмүүс жилд 1-2 удаа эмчид үзүүлж байх ёстой. Ер нь хожуу шатандаа оношлогддог.

Ер нь бол архаг явцтай бас заримдаа хурц хурдан өрнөж болдог өвчин. Хурц гэхийн тухайд, шингэн наашаа гарч байдаг механизм ажиллахаа больж, огцом даралт ихсээд мэдрэлүүд үхэждэг. Тэгвэл толгой маш их өвдөнө, бөөлжинө, огиулна, юм харахаа больж, харах талбай гаднаасаа хаагдах зэрэг шинж тэмдгүүд илэрдэг.

Залуучуудын хувьд сүүлийн үед нүд хуурайшилт ихсэж байна. Нүд хуурайшсан үед нүдээ чийгшүүлэх хэрэгтэй. Гэвч зар сурталчилгаагаар гарч байгаа зарим нүдний дусаалга нүдний улайлт арилгадаг болохоос биш чийгшүүлэх дусаалга биш. Тэгэхээр эмчээсээ маш сайн асууж авах хэрэгтэй.

---