Шатахуун хэрэглэгчдийн холбооноос хуурамч шатахууны худалдаа, нийлүүлэлт, шатахууны үнийн асуудлаар ноцтой баримтууд дэлгэж байна. 

МШХХ-ны гүйцэтгэх захирал Б.Сайнбаяр: 

-Хуурамч шатахуунаас болж жолооч нар автомашинаа, уул уурхайн салбарын хүнд даацын тоног төхөөрөмжоо эвдсээр байна. Монгол улсад жилд 300 гаруй мянган тонн хуурамч шатахууны түүхий эд импортлогдож байна. Энэ нь 400 орчим мянган тонн шатахуун болдог. Авто тээврийн хэрэгслээс ялгарах хорт утаа нь хуурамч бензин, түлшинд 2.5 дахин их, нүүрс устөрөгчийн давхар исэл 5 дахин их, бензол 12 дахин их ялгардаг нь хотын хөдөлгөөнд оролцож байгаа иргэдийн эрүүл мэндэд шууд заналхийлж байна.

Хуурамч шатахууны худалдаа, нийлүүлэлтийн ноцтой баримтууд:

-Хуурамч шатахуун үйлдвэрлэгч улс төрийн бүлэглэл 200 тэрбум төгрөгийн татвараас зугтсан.

-Хуурамч шатахууныг хадгалах буюу агуулах, тээвэрлэх, үйлдвэрлэх явцад дэлбэрэх аюултай. Хамгийн бодит жишээ нь 2021.03.02-ны үүрийн 5 цагт "Петролиум продакшн" ХХК-ийн үйлдвэрт онц ноцтой дэлбэрэлт боллоо. Энэ нь ойр орчмын ард иргэдэд асар их аюул учруулж байна.
-Хуурамч шатахуунаас ялгарч буй хорт утаа, хүхэр, бензол, нүүртөрөгчийн давхар исэл нь эмэгтэйчүүдэд үргүйдэл, ургийн гажиг үүсгэж байна.
-Монгол улсад хуурамч шатахуун хэрэглээгүй машин нэг ч байхгүй бөгөөд өдөрт таван машин тутмын нэг нь хуурамч шатахуунаар цэнэглэгдэж байдаг.

Хуурамч шатахууны гол нийлүүлэгч нь "Тарафигура" гэж компани байдаг. Энэ бол гадны компанийн салбар. Монгол болон Африкийн буурай хөгжилтэй улсуудад хуурамч шатахуун нийлүүлэх замаар мөнгө олдог. Уул уурхай, хүнд үйлдвэрийн сайд байсан Д.Сумъяабазар Онцгой албан татварын хуулийг хоёр удаа боловсруулан Сангийн яамад хүргүүлсэн ч Засгийн газрын хуралдаанд оруулаагүй, хууль болгох шаардлагагүй гэж үзэж байв. Өнөөгийн Сангийн сайд Б.Жавхланг хуурамч шатахууны эсрэг байр сууриа илэрхийлэхгүй бол огцортол тэмцэнэ.
Гэвч хуурамч шатахуун хэрэглэсээр байвал хохирогч хэвээр үлдэнэ.

---