“Ноён” группийн Ерөнхийлөгч Г.Буяндорж, түүний эхнэр МУГЖ Т.Ариунаа нар хонгилыг прокуроруудыг эсэргүүцэж, өчигдрөөс эхлэн Хэлмэгдэгсдийн хөшөөний өмнө суулт хийж байна.

МУГЖ дуучин Т.Ариунаа:

-Прокурорууд мөнгө гэдэг зүйлийг өмнөө тавьж, үнэн гэдэг зүйлээ ардаа орхиж, айл гэр бүлийг үнэхээр их зовоож байна. Тэдний энэ яргалалд монголын эрчүүд гудайгаад дууслаа ш дээ. Би хууль шүүх нь шударга шийдчих байх гэж итгээд арван жил харлаа. Би гудамжинд гарч прокурорууд руу помидор шидмээр санагдсан үе ч байсан. Нөхөр минь бизнес эрхэлж чадахгүй арван жил болох хугацаанд би мөнгөгүй болж үзлээ. Хөлөө хугалчихаад уран бүтээлээ хийж чадахгүй байж ч үзлээ. Нөхөр минь өглөө гараад л явна өдөржин шүүх прокурор гээд л явсаар байгаад ирнэ. Энэ хугацаанд таван удаа хэрэгт шалгагдаж, 409 хоног шоронд суусан. 16 удаагийн шүүх хуралд орсон байна. Гэвч нөхөр шиг минь ингэж хууль шүүхийн байгууллагад тамлагдаж байгаа дэндүү олон хүн байдаг юм байна. Бидний суултыг дэмжиж бидэн шиг хохирсон маш олон хүн ирж нэгдэж байна. Би арван жил айдастай амьдарсан. Хууль хяналтын байгууллагынхан хэзээ ирээд түйвээх бол гэсэн байнгын айдастай арван жил амьдарсан. Гэнэт л бөөнөөр гэр рүү дайрч орж ирээд зургаа долоон эрүүгийн хэрэг үүсгэж ямар нэгэн ял өгөх гээд дайраад чичрээд байдгийг биеэрээ мэдэрсэн. Би хүлээцтэй хандсан. Үнэн мөн нь тогтоогдоно гэж итгэсэн. Яагаад бусдыг тарчилж байгаа прокурорууд ял шийтгэлгүй үлдэх ёстой юм. Биднийг дэмжиж 500 гаруй залуус ирж байр сууриа илэрхийллээ. Нэг сая гаруй хүн цахимаар гарын үсгээ зурж дэмжиж байгаа хэлсэн. Мөнгөний шуналаас болж хэдэн прокурорууд олон гэр бүлийн амьдралыг тамлаж байгаад үнэхээр бухимдаж байна. Бидний тавьж буй шаардлагыг прокурорын байгууллага хүлээж авч 72 цагийн дотор хариугаа өгөх ёстой. Манай группээс уучлал гуйж буруутай прокурорууддаа хариуцлага тооцох ёстой. Хэрвээ хариуцлага тооцохгүй, хариу өгөхгүй бол би нөхрийнхөө хамтаар өлсгөлөн зарлана. 

Иргэн Н.Мөнхцэцэг:

-Би цагдаа, шүүх, прокурорын буруугаас болж хохирсон хүн. 2018 онд “Хурд” группийн “Хүннү -2020” хорооллын барилга дээр ажиллаж байсан миний 17-хон настай хүү минь тус компанийн буруутай үйл ажиллагаанаас болж амь насаа алдсан. Гэтэл прокурорынхон тэнд ажиллаж байсан гурван хүнд бүх бурууг нялзаагаад “Хурд” группийнхэн өөрсдөө ард нь нэр цэвэр үлдчихсэн. Би Хан-Уул дүүргийн мөрдөн байцаагч Рэнцэн, прокурор Энхболд гэдэг хүнд удаа дараа өргөдөл өгч “Хурд” группийн хэргийн оролцогчоор татаарай гэсээр байхад энэ хэргийг нааш цааш нь аргацааж явсаар байгаад тэр прокурор нь “Хурд” группийг биш нөгөө гурван залууг шүүхэд өгсөн. Үүнээс болоод шүүх хүний амь насны хохирлыг “Хурд” группээс огт гаргуулаагүйд би гомдож явдаг. Шүүх, прокурорууд сүүлийн 20 жил шударга бус явлаа. Баян эздийн хармаанд хууль шүүхийн орчихсон.

---