Сэжигтэй худалдааны зуучлагчид Европын Холбооны Засгийн газруудад нийт 14 тэрбум еврогийн үнэд хүрэх нэг тэрбум орчим коронавирусийн эсрэг вакцин санал болгосон гэж тус холбооны Луйврын эсрэг агентлаг мэдээлэв.

Ийм төрлийн зуучлагч нар урьдчилгаа төлбөр хүсэж байгаа хэдий ч хүргэлтийн талаар дэлгэрэнгүй мэдээлэл өгөхгүй байгаа гэж Европын луйврын эсрэг албаны дарга Вилле Итала анхааруулжээ. Мөн эмийн үйлдвэрүүд Засгийн газрууд руу шууд борлуулалт хийх хэрэгтэй гэдгийг онцолсон байна.

Тэрээр "Луйварчид хуурамч санал илгээдэг. Бидний олж илрүүлснээр, тэдний санал болгож буй вакцинууд нь яг үнэндээ байдаггүй. Их хэмжээний мөнгө байгаа газарт луйварчид ч байдаг. Үүний улмаас санхүүгийн үр дагавар гарч болзошгүй ч нөгөө талаар хүмүүсийн итгэл алдагдаж магадгүй. Тиймээс хүмүүс жинхэнэ эсвэл хуурамч вакцин хийлгэж байгаадаа эргэлзэх явдал гаргахгүйн тулд бид одооноос урьдчилан сэргийлэх нь чухал" хэмээн тэмдэглэжээ.

Европын албаныхны шалгаж буй залилангийн ажиллагаануудыг мэргэжлийн гэмт хэрэгтнүүд төдийгүй ашиг сонирхол хайсан хувь хүмүүс үйлдсэн байна. ЕХ-ны вакцинжуулалтын кампанит ажлын нийлүүлэлт тасалдаж, хойшлогдон, нийгмийн зарим эсэргүүцэлтэй тулгараад байгаа юм. Тэгвэл улам бүр нэмэгдэж буй залилангийн хэргүүд нь уг дархлаажуулалтын ажилд өөр нэгэн бэрхшээлийг учруулж байна. 

Тус холбоо нь одоогийн байдлаар бүх насанд хүрэгчдийнхээ зөвхөн тав орчим хувийг вакцинжуулаад байгаа бөгөөд энэ нь Их Британи, Израил эсвэл АНУ-тай харьцуулахад хамаагүй бага үзүүлэлт юм.

Эх сурвалж: Reuters

---