БНХАУ-ын халдварт өвчний тархалт судлаачид Америк, Хятад хоёр улс хүн амынхаа 90 хувийг вакцинжуулсан тохиолдолд сүргийн дархлаа тогтож, ирэх наймдугаар сард хилээ бүрэн нээх боломжтой гэж үзжээ.

АНУ дэлхийн бусад улс орнуудаас коронавирусийн халдварын хамгийн их тохиолдол илэрсэн буюу 30 сая орчим иргэн халдварлаад байгаа юм. Одоогоор тус улсын хүн амын 15 хувь нь коронавирусийн эсрэг вакцинжуулалтад хамрагдсан ба шинэ тохиолдлын тоо буурсан үзүүлэлттэй байна.

Энэ эрчээрээ наймдугаар сар гэхэд хүн амын 90 хувь вакцинжуулалтад хамрагдах боломжтой. Хэрэв улстөрийн сэдэлтэйгээр тавьсан бусад хоригоо цуцалж, шинжлэх ухааны үндэслэлтэй хандвал ирэх намар хоёр улсын иргэд чөлөөтэй хил нэвтрэх боломжтой гэж Хятадын Халдварт өвчнөөс урьдчилан сэргийлэх, хянах төвийн ахлах шинжээч Ву Зуню мэдэгджээ.

Хятадын хувьд халдварын тархалт харьцангуй намжмал, сүүлийн саруудад томоохон хэмжээний голомт бараг үүсээгүй. Тиймээс Ковид-19-ийн цар тахлаас дэлхийн хамгийн аюулгүй улс гэж Ву Зуню Циньхуа их сургууль, Америкийн Брүкингс хүрээлэнгийн хамтарсан цахим чуулган дээр ярьжээ. Түүний таамаглаж байгаагаар зургадугаар сар гэхэд АНУ-ын хүн амын 80 хувь нь вакцинжуулалтад хамрагдана.

Эх сурвалж: Reuters

---