БНХАУ энэ оны долдугаар сарын эцэс гэхэд хүн амынхаа 40 хувийг коронавирусийн эсрэг вакцинжуулалтад хамруулахаар зорьж байгаа гэж тус улсын Эрүүл мэндийн ахлах зөвлөх "Reuters" агентлагт мэдээлжээ.

Хятад улс вакцины экспортоо нэмэгдүүлж байгаа энэ үед уг зорилтод хүрэхийн тулд дотоодын тарилгаа мэдэгдэхүйц нэмэгдүүлэх шаардлагатай аж. Одоогоор тус улсын 100 хүнд ногдох вакцины тунгийн харьцаа нь 3.56 байгаа бөгөөд энэ нь Израил, АНЭУ болон АНУ-тай харьцуулахад хамаагүй бага үзүүлэлт юм.

Ирэх долдугаар сарын сүүлчээр хүн амынхаа 40 хувийг дархлаажуулахын тулд нэг тун эсвэл хоёр тун тариулах бүх иргэдийг хамруулж тооцно гэдгийг албаныхан онцолжээ. Хятадад үйлдвэрлэсэн гурван вакцин нь хоёр удаагийн тунгаар үр дүн үзүүлэх бол үлдсэн вакцинд нь нэг удаагийн тарилга л шаардлагатай юм. 

БНХАУ нь дотооддоо үйлдвэрлэсэн коронавирусийн эсрэг дөрвөн вакциныг олон нийтэд ашиглахыг зөвшөөрөөд байгаа бөгөөд өнгөрөгч хоёрдугаар сарын 28-ны байдлаар 52.52 сая тунг тариад байгаа ажээ.

Эх сурвалж: Reuters

---