Францын Ерөнхийлөгч асан Николя Саркозийн шүүх хурал болж, авлига хээл хахуулийн хэргээр гурван жилийн хорих ял сонслоо. Шүүхээс түүний ял эдлэх хоёр жилийг тэнсэн харгалзах ялд тооцсон бөгөөд түүний өмгөөлөгчид давж заалдах шатны шүүхэд гомдол гаргахаа мэдэгдлээ. Энэ хугацаанд экс Ерөнхийлөгчийг хорьж саатуулахгүй ч цахилгаан бугуйвч зүүж үйл хөдлөлийг нь хязгаарлах юм байна.

2007-2012 оны хооронд төрийн тэргүүний үүрэг гүйцэтгэсэн 66 настай экс Ерөнхийлөгч гэм буруугүй гэсэн байр сууриа хамгаалсаар байгаа юм. Түүнийг хүрээллийнхээ улстөрчид, өмгөөлөгч, өндөр дээд албан тушаалтнуудтай авлига хээл хахуулийн хэрэгт холбогдсон гэж буруутгасан.

Шүүх хурлын дараа Саркози ямар нэг мэдэгдэл хийгээгүй боловч түүний эхнэр Карла Бруни өөрийн Инстаграм хуудсандаа шүүх шударга бус шийдвэр гаргалаа хэмээн мэдэгджээ. Саркози Ерөнхийлөгчийн албан үүргээ хүлээлгэн өгснийхөө дараа шүүхээс ял сонссон Францын анхны экс Ерөнхийлөгч болж байна гэж хэвлэлүүд онцолжээ. Одоогоор Саркозийг олон нийтийн алба эрхлэх эрхийг хориглоогүй тул ирэх жилийн Ерөнхийлөгчийн сонгуулийн үеэр улстөрд эргэн ирэх магадлалтай гэж таамаглаж байна.

Эх сурвалж: The Guardian

---