Бельгийн "Намур" шоронгийн оршин суугчдын талаас илүү хувь нь коронавирусийн халдвар авсан нь батлагдсан тул хоригдлуудыг өрөөнд нь тусгаарлажээ.

Шоронгийн 132 хоригдлын дунд цар тахлын тархалт хурдацтай явагдаж байгаа тул тус байгууламжид хөл хорио тогтоосон байна. Хоригдлуудыг гадаа гарч алхах болон шүршүүрт орохыг хориглосон хэдий ч өдөр бүр халуун хоол, эрүүл ахуйн бүтээгдэхүүнээр хангаж байгаа аж. Мөн халдвар авсан нэг хоригдол эмнэлэгт хэвтэн эмчлүүлж байгаа гэж албаны хүмүүс мэдээлэв.

Хорих ангийн хоригдлуудын тэн хагасаас гадна уг байгууламжийн 115 ажилтны 60 орчимд нь коронавирусийн халдвар илэрсэн байна. Шоронгийн захиргааны Хэвлэлийн төлөөлөгч Кэтлин Де Вийв энэхүү нөхцөл байдлыг "маш ноцтой" гэж тодорхойлжээ. Хорих ангид уулзалт хийхийг түр хугацаагаар хориглосон бөгөөд хоригдлуудын гэр бүлийн гишүүд энэ шийдвэрийг эсэргүүцэн, шоронгийн гадаа цугларсан байна.

Бельги улсад сүүлийн дөрвөн сарын турш хорио цээрийн дэглэм тогтоогоод байгаа билээ. Шөнийн цагаар хөл хорио тогтоож, ихэнх үйлчилгээний байгууллагуудыг хаан, харин сургуулиудыг хэвийн ажиллуулж байгаа юм. Гэвч тус улсын халдварын тоо дахин нэмэгдэж байгаа бөгөөд Их Британиас гаралтай коронавирусийн шинэ хувилбар өргөн тархах болсон байна.

Өнөөдрийн байдлаар тус улсад нийт 766 мянга гаруй батлагдсан тохиолдол бүртгэгдэж, 22 мянган хүн нас бараад байгаа юм.

Эх сурвалж: BBC

---