Монголын ардчилсан хувьсгалын дууч шувуухай хэмээн ард түмэндээ хүндлэгдэн хайрлагдсан С.Цогтсайханы хөшөөнд цэцэг өргөх ёслолын ажиллагаа өнөөдөр 12:30 цагаас боллоо. Уг ёслолын ажиллагаанд Монгол Улсын баатар Э.Бат-Үүл, АН-ын дарга асан С.Эрдэнэ, УИХ-ын гишүүн С.Одонтуяа, 1990 оны Ардчилсан хувьсгалын партизанууд, С.Цогтсайхан агсны гэр бүл, найз нөхөд нийлсэн 100 гаруй хүн оролцов. 

Энэ жил МоАХ-г үүсгэн байгуулсны 30 жил, Ардчилсан үзэлтэй намууд нэгдэн нийлсний түүхт 20 жилийн ой тохиож буй учраас дээрх цэцэг өргөх ёслолыг зохион байгуулжээ. 

Монгол Улсын баатар Э.Бат-Үүл:

С.Цогтсайханы маань "Хонхны дуу" бол ардчилсан хувьсгалын түүчээ нь байсан. Ерөөс энэ дууг гарсны дараагаас л ард түмэн өөрсдөө хүний эрх, эрх чөлөөнийхөө төлөө босоод ирсэн. 30 жилийн түүхтэй ардчилсан үзэл санаа, үнэт зүйл минь сүүлийн үед алсарч байна. Дарангуйлал айсуй гэдэг нь мэдэгдэж, мэдрэгдэж байна. Энэ хүнд хэцүү цаг үед бидний үзэл санаа нэгт, уран бүтээлч андын минь цогтой халуун дуу хоолой маш их үгүйлэгдэж байна гэв.

---