Коронавирусээр өвчилсөн хүмүүсийн бараг дөрөвний нэгэнд нь халдвар авснаас хойш зургаан сарын дотор үс унах шинж тэмдэг илэрч байгаа бөгөөд эмэгтэйчүүд илүү их эрсдэлд орж байгааг шинэ судалгаагаар тогтоожээ.

Судлаачид цар тахал анх бүртгэгдсэн БНХАУ-ын Ухань хотын өвчтөнүүдийн урт хугацааны шинж тэмдгүүдийг судалж үзэхэд эмнэлэгт хэвтэн эмчлүүлсэн 1,655 өвчтөний 359-өөс нь ийм төрлийн шинж тэмдэг илэрчээ. Анагаах ухааны "Лансет" сэтгүүлд нийтлэгдсэн энэхүү судалгаагаар мөн ядаргаа, амьсгал давчдах, толгой эргэх болон үе мөч өвдөх нь халдварын урт хугацааны гол шинж тэмдгүүд гэж тогтоогдсон байна.

Мэргэжилтнүүд судалгаандаа 2020 оны нэгдүгээр сарын 7-ноос тавдугаар сарын 29-ний хооронд "Jin Yin-tan" эмнэлгээс гарсан коронавирусийн өвчтөнүүдийг хамруулжээ. Судалгааны үр дүнгээс харахад эдгээр өвчтөнүүдийн 63 хувь нь ядаргаа, булчин сулрах, 26 хувь нь нойргүйдэл, 23 хувь нь сэтгэлийн түгшүүр, сэтгэл гутралаар шаналж байсан бол 22 хувьд нь үс унах шинж тэмдэг илэрсэн байна.

Эх сурвалж: Sky News

---