Улсын хэмжээнд 147.000 оюутан суралцаж байна. Гэвч өнөө жил төсөвт Оюутны хөгжлийн зээлийн сангийн мөнгийг 50 хувь танаж оруулж ирсэн. Ингэхдээ 11 мянга гаруй оюутанд зээл олгохоор төлөвлөж байсныг бууруулж ердөө тал хувьд нь буюу 5000 оюутанд зээл олгохоор болгож оруулж ирсэн юм. 

Ингэхдээ Засгийн газрын 70-р тогтоолоор баталсан "Монгол Улсад шаардлагатай тэргүүлэх чиглэлийн мэргэжлийн жагсаалт"-д багтсан мэргэжлээр суралцаж буй оюутнуудад нийт 7.6 тэрбум төгрөгийн зээл олгохоор болсон байдаг.

 

Үүнээс үүдэн зээлээр суралцдаг байсан олон мянган оюутан сургалтын төлбөрөө төлж чадахгүй нөхцөлд хүрч, зарим нь сургууль завсардахдаа ч тулаад байгаа юм. 

Тэгвэл БШУ-ны сайд Л.Энх-Амгалан шийдвэр гаргаж Оюутны хөгжлийн зээлийн сангийн мөнгийг нэмэгдүүлэхээр болжээ. Үүний тулд Сангийн сайдын хамтарсан шийдвэр гаргаж, хамрагдах хүсэлтээ гаргасан 5000 гаран оюутнуудыг нэмж зээлд хамруулахаар болсон байна.

Мөн их, дээд сургуулиуд танхимаар хичээл ороогүй атал сургалтын төлбөрөө бүтнээр нь авч байгаа асуудал оюутнуудад санхүүгийн дарамт болж байгаа асуудлаар оюутнууд өргөдөл, гомдол гаргасаар байгаа ч шийдэгдэхгүй байна. 

Тэгвэл БШУ-ны сайд Л.Энх-Амгалан оюутнуудын төлбөрөө хөнгөлүүлэх асуудлыг авч үзэн, тооцоо судалгааг нь хийж, ямар гарц, ямар боломж байгаа талаар Засгийн газрын хуралдаанд танилцуулахаар болжээ. 

---