Австралийн эрдэмтэд тус улсад олдсон хамгийн эртний буюу 17,300 жилийн тэртээ үлдээсэн имжний сүг зургийг хадан дээрээс олжээ. Ойролцоогоор хоёр метр урттай уг сүг зургийг хадан дээр улаан зосон будгаар зурсан байжээ.

Эртний имжний сүг зургийг Баруун Австралийн Кимберлигийн бүс нутгаас олсон байна. Эрдэмтэд сүг зургийг үргэлжлүүлэн судалж байгаа юм. Энэ нь одоогоор Австрали улсын нутаг дэвсгэрээс олдсон хамгийн эртний хадан дээрх амьтны сүг зураг гэдгээрээ онцлог ажээ.

Судалгааг хамтран явуулсан Баруун Австралийн их сургуулийн доктор Свен Озмэний хэлснээр уг олдвор нь имжний зураг ба эртний урлагийн холбоо харилцааг судлахад нэн тустай олдвор гэж үзэж байна.

Зүүн өмнөд Азийн арлуудаас олдсон хадан дээрх имжний сүг зургууд ойролцоогоор 40,000 жилийн өмнөх түүхийг өгүүлдэг ажээ. Энэ жилийн эхэнд эрдэмтэд Индонезийн Сулавеси арлаас зэрлэг бодон гахайн амьдын хэмжээтэй эн тэнцүү 45,000 жилийн настай зургийг олсон нь амьтдыг байгаагаар нь дүрсэлсэн хадны хамгийн эртний сүг зураг юм.

Харин хадан дээрх дүрс бичгийн хамгийн эртний зураасыг Өмнөд Африкаас олдсон чагт хэлбэрийн зураас гэж үздэг. Уг чагталсан зураас нь 73,000 жилийн настай гэж тооцоолоод байгаа юм.

Эх сурвалж: ВВС

---