Сангийн сайд Б.Жавхлан Засгийн газрын ээлжит бус хуралдаанаар хэлэлцсэн асуудлыг талаар мэдээлэл хийлээ.
Сангийн сайд Б.Жавхлан: Эдийн засгийг сэргээх 10 их наяд төгрөгийн төлөвлөгөөг өнөөдрийн хуралдаанаар онцгойлон хэлэлцлээ. Дэлхий нийтээрээ аюулт цар тахалтай анх удаа нүүр тулсан бөгөөд эрүүл мэндийг нэгдүгээрт тавих, эдийн засгийг нэгдүгээр тавих гэх хоёр төрлөөр тэмцэж байгаа.

Монгол Улсын хувьд ард иргэдийн эрүүл мэндийг эн тэргүүнд тавьж байсан бол цаашид эдийн засгийг хамтад нь авч үзэх ёстой хэмээн шийдсэн.

Хэрэв эдийн засгийг энэ хэвээр нь үргэлжлүүлбэл улс орны эдийн засаг ихээхэн цохилт авч, эрүүл мэндийн салбараа ч санхүүжүүлж чадахгүй хэмжээнд хүрч болохыг үгүйсгэхгүй.
10 их наядын төлөвлөгөөг хоёрдугаар сарын 10-нд ерөнхий төлөвлөгөөг танилцуулсан. Цаашид салбар бүрээр нь нарийвчлан танилцуулах болно.
Мөнгөний нийлүүлэлтийн тухайд мөнгө хэвлэх гэж байна гэх мэдээлэл иргэдийг төөрөгдүүлж байна. Сүүлийн нэг жилийн хугацаанд эдийн засгийг хүний биеэр зүйрлэвэл цусны эргэлт нь үндсэндээ 60-70 хувь зогссон.
Эдийн засгийн хэвийн өсөлттэй жилүүдэд мөнгөний эргэлт 35 хувьтай байдаг. Харин өнгөрсөн онд 15 хувь болсон. Эдийн засгаа сэргээнэ гэдэг нь товчхондоо мөнгөний эргэлтийг сэргээх юм. Бэлэн мөнгө хэвлэн тараахгүй. Банкуудад байгаа нөөц хөрөнгийг зээл хэлбэрээр эдийн засагт оруулах юм. Зээлийн хэлбэрээр бодит эдийн засаг руу оруулахын тулд байж болох хамгийн бага 3 хувийн хүүтэй, хамгийн боломжит нөхцөлөөр зээл олгоно. 
Энэ сарын 17-ны Засгийн газрын хуралдаанаар салбар бүрээр нь нарийвчлан танилцуулна. 
Хамгийн түрүүнд дараах арга хэмжээг авна гэдгийг танилцуулав:

• Одоо хэрэгжиж байгаа ипотекийн зээлийг хүртээмжтэй олгох
• Жилдээ хоёр их наяд төгрөгийн санхүүжилтийг банкуудаар дамжуулан олгох
• ААН-үүдэд 3 хувь хүртэлх зээлийг банкуудаар дамжуулан олгоно.

---