Нийтэлсэн:   С.БУДРАГЧАА

3 жилийн өмнө

Баянзүрх дүүргийн нэгдсэн эмнэлгийн эмч, сувилагч, ажилтнууд 2020 оны арванхоёрдугаар сараас хойш өнөөдрийг хүртэлх хугацаанд гар дээрээ нэг ч төгрөгийн цалин аваагүй байна. Үүнээс үүдэн тус эмнэлэгт ажилладаг хүмүүс байрны лизинг, цалингийн зээлээ хугацаандаа төлж чадахгүйд хүрч сэтгэл санаа, санхүү мөнгөөрөө хохирч байна хэмээн манай редакцид мэдээллээ.

Тус эмнэлгийн ажилтнууд удирдлагуудаасаа цалин мөнгөө хэзээ тавих вэ? хэмээн асуухаар "Өнөөдөр өгнө, маргааш өгнө, хоёр хоноод өгнө, хоёрдугаар сарын 05-нд өгнө" гэхчилэн ам тагласаар байгаад маш их бухимдаж буйгаа илэрхийлж байв.

Иймд Баянзүрх дүүргийн нэгдсэн эмнэлгийн ерөнхий нягтлантай утсаар холбогдож, цалингаа яагаад тавихгүй удаж байгаа шалтгааныг тодруулахад

“Манай эмнэлэгт 2020 оны арванхоёрдугаар сарын 22-ны өдөр коронавирусийн халдвар бүртгэгдэж томоохон голомт болсныг та бүхэн мэднэ. Ингээд өндөржүүлсэн бэлэн байдалд байсаар байгаад 2021 оны нэгдүгээр сарын 16-ны өдөр л манай эмнэлгийг албан ёсоор сулласан. Түүнээс хойш нэгдүгээр сарыг дуустал нэг ч өвтөн хүлээн авах боломжгүй байж байгаад энэ сарын 01-нээс л өвчтөн хүлээн авах болсон.

Манай эмнэлэг улсын биш, хувийн эмнэлэг учраас манайхаар хэвтэн эмчлүүлсэн хүмүүсийн эрүүл мэндийн даатгалаас орж ирсэн мөнгөөр л санхүүжиж, үйл ажиллагаагаа явуулдаг. Харамсалтай нь гэнэтийн давагдашгүй хүчин зүйлийн улмаас ийнхүү хямарчихаад байгааг минь ойлгоорой. Бид бүхэн ажилтнуудынхаа цалинг тавих гээд ЭМЯ, ЭМДЕГ-аас бидэнд олгох санхүүжилтээсээ урьдчилаад 70-80 сая төгрөгийн санхүүжилт олгож өгөөч. Сар шинээс өмнө нь ажилтнуудынхаа цалинг тавимаар байна гэж гуйж хөөцөлдөөд л гүйгээд байна. Үнэхээр хэцүү байна. Өнөө маргаашийн дотор багтааж цалинг нь тавих гээд энэ тэрүүгээр тасралтгүй гүйцгээж байна” гэх тайлбар өглөө.

УОК болон эрх бүхий байгууллагын уялдаагүй холбоогүй, хэт сүржин шийдвэрүүдийн улмаас маш олон байгууллага иргэн хохирч байгаагийн нэг жишээ нь Баянзүрх эмнэлгийн ажилтан алба хаагчид болоод байна.

Сурталчилгаа