Дулааны шугам сүлжээний худагт халуун усны хоолой задарч, гурван хүн амиа алдсан талаар ЦЕГ-ын ХМОНХХ-ийн ажилтан, цагдаагийн ахмад М.Мөнхшүрээс тодруулга мэдээлэл авлаа. 

ЦЕГ-ын ХМОНХХ-ийн ажилтан, цагдаагийн ахмад М.Мөнхшүр:

-БГД-ийн V хорооны нутаг дэвсгэр 27-р байрны хажууд ”Тэлмүүн орд” хувийн орон сууцны конторын эзэмшлийн дулааны худгаас их хэмжээний уур гарч байгаа тухай дуудлага мэдээлэл цагдаагийн байгууллагад ирсэн. Энэ дагуу БГД-ийн харьяа цагдаагийн бие бүрэлдэхүүн хэргийн газарт очсон. Ингэхэд БГД-ийн VI хороо 19 дүгээр байрны дулааны худагт нийт таван хүн байсан бөгөөд гурван иргэн халуун усанд түлэгдэж нас барсан. Хоёр иргэний хувьд гэмтэл авч, ГССҮТ-д хэвтэн эмчлүүлж байна.

Амь хохирогчдийн хувьд БЗД-ийн харьяат иргэн Э /43 настай, эрэгтэй/, У /41, эмэгтэй/, хэн болох нь тодорхойгүй нэг эрэгтэй хүн байсан. Биедээ гэмтэл авсан хоёр иргэний хувьд Дархан-Уул аймгийн харьяат 43 настай Г, Ховд аймагт оршин суух хаягтай 26 настай Ц болохыг тогтоосон. Тухайн иргэдийн хувьд оршин суух хаягтай ч тухайн хаяг дээрээ оршин суудаггүй, орон гэргүй гэж урьдчилсан байдлаар тогтоогдсон. Шүүх эмнэлгийн дүгнэлтээр 72 цагийн дотор хохирогчдийн биед хохирол үүссэн эсэхийг тогтооно.

Цагдаагийн байгууллагаас тухайн дулааны шугам ямар учраас задрах болсон. Тухайн иргэд ямар учраас тэнд хэд хонож байсныг шалгалтын явцад тогтоож ажиллана гэв.

---