ХӨСҮТ-өөс цаг үеийн асуудлаар мэдээлэл өгч байна. Коронавирусээр өвчилсөн үедээ 2, өвчлөөд эдгэрсний дараа 2 хүн нас барж нийт нас баралт 4 болсон гэдгийг ХӨСҮТ-ийн Тандалт, судалгааны албаны дарга А.Амбасэлмаа хэллээ. Монгол Улсад коронавирусийн дотоодын халдвар 2020 оны арваннэгдүгээр сарын 11-нд бүртгэгдсэн өдрөөс хойш дөрвөн тохиолдол нас барсан. Энэ дөрвөн тохиолдлын хоёр нь коронавирус халдвараар өвчлөөд эдгэрсний дараа архаг хууч өвчин, зүрхний хэм алдагдлын улмаас эндсэн. Хоёр тохиолдол нь оношлогдоод эмчлэгдэж байх хугацаанд нас барсан.

Ингээд өвчилсөн үедээ хоёр, өвчлөөд эдгэрсэн үедээ хоёр, нийт дөрвөн хүн нас бараад байна. 

 Эдгээр тохиолдлын хугацааг нэрлэвэл:

• 2020 оны 12 сарын 25
   
• 2021.01 сарын 05 
   
• 2021.01 сарын 12
   
• 2021.01 сарын 22-нд тус тус бүртгэгдсэн. 

Халдварын батлагдсан тохиолдлын ойрын хавьтлуудыг ажиглан тусгаарлах байранд тусгаарлаж байгаа бөгөөд сүүлийн долоо хоногт өдөртөө 25-35 тохиолдол нэмэгдсэн. Батлагдсан тохиолдол нэмэгдэхийн хэрээр хавьтлын тоо нэмэгдээд явдаг. “Тоёоко Инн” зочид буудалд сүүлийн долоо хоногт өвчилсөн хүмүүсийн ойрын хавьтал 300 орчим хүн тусгаарлагдаж байсан. Тусгаарлалтад байсан хүмүүсийн анхан болон давтан шинжилгээгээр халдвар илэрсэн. Ингээд халдвартай иргэдийг ХӨСҮТ-рүү шилжүүлсэн. 

Тусгаарлан ажиглах байранд хавьтлуудыг долоо хоног тусгаарлах хугацаанд хоёр удаагийн шинжилгээгээр халдвар илрээгүй бол гэрийн ажиглалтад шилжүүлэн долоо хоног ажиглаж байгаа. 

ЭМЯ-ны зүгээс “Тоёоко Инн” зочид буудалд тусгаарлагдаж байсан 31 иргэнээс коронавирусийн халдвар илэрсэн нь өчигдрийн 11:00 цагийн мэдээлэл дунд багтсан. Иргэдийг ХӨСҮТ-рүү шилжүүлэх ажил 11:00 цагийн мэдээллээс хойш зохион байгуулагдсан учраас буруу ойлголт үүссэн байна хэмээх тайлбарыг мөн өгсөн юм. 

---