Баянзүрх дүүргийн ЗДТГ болон түүний харьяа агентлагуудад ажилладаг төрийн алба хаагчдыг хуугаар нь хууль бусаар халж, сольж байна гэдэг мэдээлэл саяхнаас гарах болсон. Уг асуудалд Баянзүрх дүүргийн Засаг дарга Н.Баярмөнх албан ёсоор хариу тайлбар өглөө.

Баянзүрх дүүргийн Засаг дарга Н.Баярмөнх:

Би ажлаа авснаас хойш өнөөдрийг хүртэлх хугацаанд хууль бусаар төрийн алба хаагчдыг хальсан сольсон нэг ч асуудал байхгүй. Яахав тэтгэвэрт гарах насанд хүрсэн, өөрийн хүсэлтээр ажлаар чөлөөлөгдөх хүсэлтээ гаргасан цөөн хүмүүсийг чөлөөлсөн зүйл бол бий. Ажлаас хууль бусаар халсан сольсон гэх асуудлаар шүүхийн маргаан үүссэн хэрэг огт байхгүй.

Баянзүрх дүүргийн хороон дээр улс төржилт хэрээс хэтэрсэн. Сүүлийн найман жилд энэ явдал хавтгайрсан. Дүүрэг хороон дээр ер нь улстөржих ямар ч шаардлага байхгүй. Энэ дүүрэг хороонд чинь аж ахуйн ажил явж байх ёстой. Хороон дарга нар хур хогнийхоо асуудлыг дүүрэгтэйгээ ярьж шийдвэрлэх гарц шийдлээ олох ёстой биз дээ. Гэтэл огт тэгэхгүйгээр хур хог ихтэй боллоо хэмээн утсаараа лайвдах нь зохисгүй.

Манай дүүрэг бусад дүүргээсээ онцлог хэд хэдэн шинжтэй. Тухайлбал, томоохон худалдааны захууд, ХӨСҮТ, цэргийн госпитал зэрэг томоохон эмнэлгүүдтэй учраас хүмүүсийн зорчих хөдөлгөөний урсгал ихтэй. Ийм учраас коронавирусийн эсрэг тэмцэхэд хүндрэл бэрхшээл багагүй учирч байгаа. Тиймээс иргэд та бүхэн хариуцлагатай байж, урьдчилан сэргийлэх арга хэмжээгээ сайн авч, улстөржихгүйгээр хамтарч ажиллавал энэ асуудлыг шийдэж чадна.

---