УИХ-ын гишүүн С.Ганбаатар Оюутолгойн гэрээг энэ сарын 31-ээс өмнө яаралтай өөрчлөх шаардлагыг Засгийн газарт хүргүүлж, улмаар Сүхбаатарын талбайд өлсгөлөн зарлаж эхэлсэн. Тэрээр өлсгөлөн зарлаад нэг өдөр хагастай болж байна. Харин өнөөдөр ХЗДХ-ийн сайдын үүрэг гүйцэтгэгч Х.Нямбаатар ирж түүнтэй уулзан, өлсгөлөнгөө зогсоож, хамтарч ажиллахыг хүслээ. 

ХЗДХ-ийн сайдын үүрэг гүйцэтгэгч Х.Нямбаатар: 

У.Хүрэлсүхийн Засгийн газар
1. Оюу толгойд 1 их наядын татварын акт тавьсан
2. Дубайн гэрээг цуцлах хүртэлх арга хэмжээ авахаа мэдэгдсэн
3. 2009 онд байгуулагдсан гэрээг шинэчлэх бус бүрэн өөрчлөхөөр шулуудсан. Иймд С.Ганбаатар гишүүнтэй зорилго нэг байгаа учир хамтарч ажиллаж, Оюутолгойн гэрээг өөрчлөх ажлын хэсэгт орж ажиллахыг хүссэн юм.

Гэхдээ Оюутолгой компани татварын өрийг төлөхгүй гэж Арбитрийн шүүх дээр маргаан үүссэн. Харин 2021 оны 12-р сарын 21-ний дотор татварын асуудлаар Арбитрийн шүүхэд манай тал тайлбар өгөх ёстой. Хэрэв Оюутолгой Монголын талаас тавьсан саналыг огт хүлээн зөвшөөрөхгүй, татвараа төлөхгүй бол Хөрөнгө оруулалтын гэрээг цуцлах бодлого барьж байгааг онцоллоо. 

Мөн 2020 оны арванхоёрдугаар сарын 18-нд ажлын хэсэг -Рио Тинто"-гийнхонтой хэлэлцээрийн ширээнд суусан. Хэлэлцээрийн ширээний ард Монголын Засгийн газар анх удаа хөрөнгө оруулагч талд хэд хэдэн шаардлага тавьсан. Үүнд, Дубайн гэрээг бүрмөсөн цуцлах шаардлага тавьсан. Мөн 2009 онд байгуулсан үндсэн хөрөнгө оруулалтын гэрээг ч өөрчлөх шаардлага тавьснаа онцолсон юм. 

УИХ-ын гишүүн С.Ганбаатар:

Лондон, Нью-Иорк, Хонг Конгийн зэрэг гадаадын олон шүүх дээр Оюутолгойн гэрээг байгуулахдаа авлига өгч байгуулсан нь тогтоогдсон байхад Монгол Улсын Засгийн газраас нэхэмжлэл гаргаад монголын ард түмний эрх ашгийг хамгаалж, Оюутолгойн гэрээг цуцлах шийдвэрийг яг одоо гаргах ёстой. Нэхэмжлэлээ гаргах хүртэл нь өлсгөлөнгөө үргэлжлүүлнэ.

Мөн Оюутолгойн гэрээг байгуулах ажлын хэсэгт орохдоо өөрийн байр суурь, үзэл санаагаа тусгуулж ажиллана гээн юм.

Харин Засгийн газрын хэрэг эрхлэх газрын дэд дарга Б.Солонго:

“Бидэнд байгаа мэдээллээр нэгдүгээр сарын 31-ний дотор сөрөг нэхэмжлэх гаргахтай холбоотой ямар нэг маргаан байхгүй. "Оюутолгой" төсөлтэй холбоотой татварын Арбитрын маргаан үргэлжилж байгааг та бүхэн мэднэ. Энэ маргаантай холбоотой тайлбараа Засгийн газар ирэх сарын 21-ний дотор өгөх ёстой. Маш сайн үндэслэлтэй, хариу тайлбар бэлдэхээр ажиллаж байна. Бэлтгэл ажлаа хангаж байна. 2018 онд Засгийн газар “Оюутолгой” ХХК-д 350 тэрбум төгрөгийн татварын акт тавьсан. Үүн дээр нэмээд өнгөрсөн сард 650 тэрбум төгрөгийн татварын акт тавьсан. Эдгээр актыг төлөхгүй гэж тус компани үзсэн тул маргаан үүсгэсэн юм. Засгийн газар байр сууриа хамгаалж, Арбитрын маргаанд оролцоно” гэсэн юм. 

 

 

 

---