БНСУ-ын Олимпийн алтан медальт гүйлтийн тэшүүрийн тамирчин Шим Сүк Хид өсвөр наснаас нь хойш бэлгийн дарамт үзүүлсэн гэж буруутгагдаад буй дасгалжуулагч Чо Жэ Бомд 10,5 жилийн хорих ял оноосон гэдгийг мэдээллээ.

Ёнхап агентлагийн мэдээлснээр Сувон дүүргийн шүүх Чо Жэ Бомыг удаа дараалан Олимпийн алтан медальт тамирчинд бэлгийн дарамт учруулсан хэргээр ийнхүү ял оноожээ.

Шим Сүк Хи нь дасгалжуулагчийн эсрэг гомдлоо 2019 оны нэгдүгээр сард шүүхэд өгч байжээ. Ингэхдээ өсвөр настай байхад нь удаа дараа бэлгийн дарамт үзүүлснээс гадна биед нь халдаж байсан хэмээн буруутгасан юм. 23 настай тамирчин Олимпийн наадмаас дөрвөн медаль хүртсэн бөгөөд 2014 оны Сочигийн өвлийн Олимп болоод 2018 оны Пёнчаны өвлийн Олимпоос тус тус алтан медаль хүртэж байсан билээ.

Залуу тамирчин 17 настай байхдаа бэлгийн дарамтад өртөж байсан гэдгээ шүүхэд гомдол мэдүүлсэн нь БНСУ-ын ард иргэдийг багагүй цочролд оруулсан юм. Дасгалжуулагч Чо Жэ Бом бэлгийн хүчирхийлэл үйлдсэн хэргээр 10 гаруй жилийн хорих ял авахаасаа өмнө Шим Сүк Хигийн биед халдсан хэргээр жил хагасын хорих ял сонсоод байжээ. Ингээд нийтдээ 12 жил торны цаана суух болж байна.

Өмнөд Солонгост эцгийн эртх ёс давамгайлсан хэвээр учир бэлгийн хүчирхийллийн гэмт хэргийн хохирогчдод олны зүгээс дарамт шахалт ихээхэн ирдэг ба хүчирхийлэгчдэд харьцангуй хөнгөн ял оноох нь олонтаа гэж эх сурвалжид дурджээ.

Эх сурвалж: The Guardian

---