Индонезийн Бали арлын эрх баригчид амны хаалтын дүрэм журам зөрчсөн гадаадын иргэдэд ер бусын шийтгэл ногдуулж байна. Тус арлын хууль хяналтынхан гадаадын жуулчдыг дасгал хийлгэж байгаа нь энэ долоо хоногт олон нийтийн сүлжээгээр тархсан бичлэгүүдээс харагдах аж.

Индонези улсад өнгөрсөн жил тохиосон коронавирусийн халдварын өргөн хэмжээний тархалтын улмаас Бали арлын эрх баригчид олон нийтийн газарт зайлшгүй амны хаалт зүүх захирамж гаргасан. 

Гэвч сүүлийн өдрүүдэд олон тооны гадаадын иргэн амны хаалтгүй явах болсныг арлын Аюулгүй байдлын албаны ажилтан Густи Агунг Кетут Сурянегара тэмдэглэсэн юм. Тэрээр "AFP" агентлагт өгсөн ярилцлагадаа "Жуулчид эхлээд энэхүү журмын талаар мэдээгүй гэдэг. Дараа нь тэд амны хаалтаа мартсан, эсвэл амны хаалт нь норсон, урагдсан зэрэг шалтаг тавьдаг" гэж ярьсан байна.

Зөрчил гаргасан 70 гаруй хүн 100 мянган индонезийн рупи буюу долоон ам.долларын торгууль төлсөн бол бусад 30 орчим хүн бэлэн мөнгөгүй байсан тул тэднийг гар дээр суниалт хийлгэн шийтгэжээ. Амны хаалт зүүгээгүй иргэд 50 удаа суниалт хийх ёстой бол амны хаалтаа буруу өмссөн хүмүүс 15 удаа суниах шаардлагатай аж.

Балигийн эрх баригчид цар тахлын дүрэм журмыг зөрчсөн гадаадын иргэдийг эх орноосоо хөөж магадгүй гэж анхааруулсан ч одоогоор амны хаалт зүүгээгүйн улмаас аливаа этгээдийг албадан гаргасан тухай мэдээлэл алга байна. Коронавирусийн улмаас жуулчдад албан ёсоор хаалттай хэвээр байгаа Бали аралд удаан хугацаагаар амьдардаг гадаадын оршин суугчид элбэг байдаг билээ. Мөн Индонезид амьдардаг гадаадын иргэд тус арал руу аялах боломжтой юм.

Эх сурвалж: The Korea Times

---