АНУ-ын 46 дахь Ерөнхийлөгчөөр сонгогдсон Жозеф Робинетт Байден тангараг өргөж, тус улсад тохиогоод буй хүнд хэцүү цаг үед улс орноо удирдан чиглүүлэх үндэсний эв нэгдлийн үзэл бодлыг баримтлахаа амлав.

Жо Байден 35 үгтэй тангаргаа өргөн, Ерөнхийлөгчийн бүрэн эрхийг албан ёсоор өвлөн авсан мөчийг сая сая америкчууд гэрээсээ үзсэн юм. Байден тэргүүтэй бүх зочид амны хаалт зүүн, хоорондоо зай барин суусан байна. Одоог хүртэл ялагдлаа албан ёсоор хүлээн зөвшөөрөөгүй байгаа Дональд Трамп лхагва гарагийн өглөө Цагаан ордноос явсан бөгөөд тангараг өргөх ёслолд ирээгүй. Харин онцлох зочдын дунд албан үүргээ хүлээлгэн өгч буй дэд ерөнхийлөгч Майк Пенс ба Клинтон, Буш, Обама нарын гэр бүл байсан юм.

Капитол Хиллд болсон засгийн эрхийг шилжүүлэх хүндэтгэлийн ёслолын үеэр Байден "Ардчилал яллаа" хэмээн тунхаглажээ. Цар тахлын улмаас үзэгчгүй болсон арга хэмжээний үеэр тэрээр "Энэ бол Америкийн өдөр. Энэ бол ардчиллын өдөр. Манай үндэстний түүхэнд цөөхөн хэдэн хүн л бидний одоо туулж буйгаас илүү хүнд сорилт, хүнд хэцүү цаг үеийг даван туулж байсан" хэмээн тэмдэглээд, өвчин зовлон, эдийн засгийн хямрал, арьс өнгөөр ​​ялгаварлан гадуурхах үзэл, улс төрийн хуваагдалд нэрвэгдсэн улс орноо сэргээн босгоход бүх сэтгэл зүрхээ зориулна гэж амласан байна.

Байден тангараг өргөснөөсөө хойш хэдхэн цагийн дараа үүрэгт ажлаа эхлэн, 17 тушаал, удирдамжид гарын үсэг зурж, амласан ёсоор Трампын гаргасан хамгийн маргаантай шийдвэрүүдийг засаж залруулах ажилдаа оржээ. Тэрээр холбооны барилга байгууламжид амны хаалт зүүхийг шаардсан тушаал гаргаж, тус улсад хууль бусаар амьдарч буй сая сая цагаачдад иргэний харьяалал олгох цагаачлалын хуулийн төслийг Конгресст илгээжээ.

Эх сурвалж: The Guardian

---