УИХ-ын гишүүн Г.Амартүвшин "Хөгжлийн банк"-ны захирлаар ажиллаж байхдаа өөрийн найз УИХ-ын гишүүн Г.Дамдинням, Х.Ганхуяг нарын хамтын эзэмшлийн "Вертекс майнинг сервис" компанид 33 тэрбум төгрөгийн зээл олгосон баримт дэлгэгдээд байгаа. 

Тодорхой хэлбэл, УИХ-ын гишүүд эрх мэдэл, нэр нөлөөгөө ашиглан их хэмжээний мөнгийг хулгайлсан гэж иргэд, олон нийт үзэж байна. Тиймээс ч дээрх гурван гишүүний үйлдлийг эсэргүүцэж, УИХ-ын гишүүний суудлаасаа огцрохыг шаардан "Алтан дорнод Монгол" ХХК-ийн ерөнхий захирал Т.Ганболд, "Үнэн ба Зөв" намын дарга А.Отгонбаатар, хуульч Т.Бат-Оргил, судлаач Ж.Ганбаатар, БНН-ын дарга Б.Жаргалсайхан нар мэдээлэл хийлээ.
Тэд эрх баригчдын, хууль тогтоогчдын болохгүй, бүтэхгүй байгаа бүхнийг илчилсэн хүн бүрийг торгож, шийтгэж, ялладаг атал өөрсдөө хулгайлж, хуйвалдаж, буруу зөрүү ажиллаж байхад хэн ч хариуцлага ярихгүй байгаа нь шударга бус явдал. Тиймээс дээрх гишүүдэд хариуцлага тооцох ёстой, түүний төлөө иргэд тэмцэхийг уриалж, шаардаж байгаагаа онцоллоо.

---