Аргентин улсын баруун төвийн Сан Хуан мужид даваагаас мягмар гарагт шилжих шөнө 6,4 магнитудын хүчтэй газар хөдөлсөн байна.

Хүчтэй газар хөдлөлт болсон газраас 1,000 орчим км-ын зайтай 20 минутын дараа Нуэвэ дэ Жулио хотоос баруун урагшаа 27 км-т 5 магнитудын хүчтэй газар хөдөлжээ. Үүний дараа дахин 4,9 магнитудын хүчтэй газар хөдлөлтийн чичирхийлэл бүртгэгдсэн байна.

Номхон далайн цунамийн анхааруулга сэрэмжлүүлгийн төвийн мэдээлснээр хүчтэй газар хөдлөлтийн дараа цунамийн аюул нүүрлээгүй. Сан Хуан мужийн захирагч Сергио Унак ард иргэдийг тайван байхыг уриалсан байна. Мөн иргэдийн аюулгүй байдлыг хамгаалахын тулд иргэд болон аюулгүйн хүчнийхэнтэй хамтран ажиллахаа тэрээр мэдэгджээ.

Сан Хуан мужийн айлуудад газар хөдлөлтийн чичирхийлэл мэдрэгдсэн боловч одоогоор ноцтой гарз хохирол учирсан тухай мэдээлээгүй байна.

Эх сурвалж: CNN   

---