ОХУ-ын Ерөнхийлөгч Владимир Путиныг хурцаар шүүмжлэгч, сөрөг хүчний нэрт тэмцэгч Алексей Навальныйг хордуулж амь насыг нь бүрэлгэх гэсэн оролдлого гарснаас хойш таван сарын хугацаа өнгөрчээ. Тэрээр өнгөрсөн хугацаанд ХБНГУ-д эмчлүүлж байгаад өнөөдөр өглөө Москвад эргэн ирсэн байна.

44 настай тэмцэгчийг Шереметьево нисэх буудалд газардсан даруйд пасспортын хяналтын хэсгээс цагдаа нар баривчлан авч явжээ. Навальныйгийн Берлинээс ирсэн онгоц Шереметьево нисэх буудалд газардах ёсгүй байсан боловч чиглэлээ гэнэт өөрчлөн энд буусан байна. Навальный Внуково нисэх буудалд газардах ёстой байсан тул түүнийг дэмжигч олон мянган иргэн Внуковод цуглан хүлээж байжээ.

Өнгөрсөн жилийн намар сөрөг хүчний тэмцэгчийг Сибирийн нутагт новичокоор хордуулсан хэргийг Оросын Засгийн газар захиалсан хэмээн барууны орнууд буруутгаж байгаа ч Кремль эрс үгүйсгээд байгаа юм. Навальныйг баривчилсан тухай мэдээллийг Европын Холбоо, Франц, Итали зэрэг өрнөдийн улс орнууд зэмлэн буруутгалаа.

Энэ лхагва гарагт тангаргаа өргөх гэж байгаа АНУ-ын шинэ Ерөнхийлөгч Жо Байдены үндэсний аюулгүй байдлын зөвлөх Жэк Сулливан “Навальный руу халдаж байгаа нь хүний эрхийг зөрчсөн үйлдэл болоод зогсохгүй тэдний дуу хоолойг сонсохыг хүссэн Оросын ард түмнийг доромжилж байна” хэмээн уриалжээ.   

ОХУ-ын шүүхийн шийдвэр гүйцэтгэх газраас сөрөг хүчний удирдагчийг 2020 оны 12 дугаар сарын 29-ний өдрөөс эрэн сурвалжилж, баривчлах тушаал гарсан ба тэнсэн харгалзах хугацааг удаа дараа зөрчсөн гэж буруутгасан байна. Шүүхийн шийдвэр гарах хүртэл Алексей Навальныйг баривчлан саатуулах юм байна. Улс төрийн сэдэлтэй хэргүүдээс гадна түүний хандивын байгууллагуудаар дамжуулан мөнгө угаасан хэргийг Оросын прокурорууд шалгаж, мөрдлөг явуулж байна.

Эх сурвалж: ВВС

---