"Төрөөс зарласан тендерээс авлагатай аж ахуйн нэгжүүдийн авлагыг татварт нь суутган барагдуулна" гэсэн утга бүхий Монгол улсын Засгийн газрын 2020 оны арваннэгдүгээр сарын 18-ны 183 тоот тогтоол гарсан ч энэ нь аж ахуйн нэгжүүдийг хулхидаж, доромжилсон арга хэмжээ боллоо хэмээн УИХ-ын гишүүн асан, "Билэг" ХХК-ийн ерөнхий захирал С.Билэгсайхан мэдэгдлээ. 

"Билэг" ХХК-ийн ерөнхий захирал С.Билэгсайхан: 

-Засгийн газрын энэхүү тогтоолыг бид маш талархаж хүлээж авсан. Төсвийн болон орон нутгийн санхүүжилтээр ажил төсөл гүйцэтгэсэн аж ахуйн нэгжүүдийн авлагыг татварт нь суутган барагдуулна гэсэн. Мэдээж, аж ахуйн нэгжүүдэд татварын өр байгаа шүү дээ. Улс бол нэг халааснаасаа авч, нөгөө халаас руугаа хийнэ гэсэн үг. 

"Билэг" ХХК-ийн хувьд улсаас 71,8 сая төгрөгийн авлагатай. 2012 онд улсын төсвийн тендерийн ажил гүйцэтгэсэн. 2018 онд шүүхийн шийдвэр гарсан. Найман жил мөнгөө авч чадахгүй явж байна. Гэтэл оны өмнө Засгийн газрын тогтоол гарангуут бид баярлаад, бичиг баримтаа бүрдүүлээд өгтөл Баянзүрх дүүргийн Татварын газраас 12 сарын 31-нд албан бичиг ирсэн. Ондоо багтаж өр төлбөргүй болох нь гээд задлаад үзтэл 2022 оны ХЗДХЯ-ны багцад таны мөнгө орсон гэсэн хариу ирсэн. Ингэж аж ахуйн нэгжүүдээ хулхидаж, доромжилж байгаа юм. Хүүхдүүд "тоглохоо болилоо" гэдэг шиг завсрын, хуурсан тогтоол болчихлоо. Энэ бол өгөхгүй гэсэн хууралт болчихлоо. 

---