СХД-ийн 17-р хороо, 33-р байрны нэгдүгээр давхарт иргэд, оршин суугчдын эсэргүүцлийг үл тоон нэгэн иргэн авто гарааш, автомашины шил солих өргөтгөл барьсан талаар манай LIVETV телевизэд иргэд хандсан юм.

СХД-ийн ИНХ-ийн дарга Ч.Лүмэдмаа: Хөл хориогоор далимдуулаад хоёр сарын өмнө байрны нэгдүгээр давхарт гарааш барьчихлаа. Иргэд, оршин суугчдийн хувьд амьдрах таатай орчин алдагдаж, дуу чимээ их гаргаж байна хэмээн маш их эсэргүүцэж, удаа дараа шаардлагыг хороотой хамтран тавьсан боловч бид нарын шаардлагыг хүлээн аваагүй.

Ингээд дүүргийн Газар зохион байгуулалтын газрын даргын 12 дугаар сарын 24-ний өдрийн тушаалаар тус авто гараашийг албадан буулгах мэдэгдэл гаргаж, хуудас наасан ч хурдан баригдсан шигээ буулгаагүйд иргэд бухимдалтай байна.

СХД-ийн 17 дугаар хорооны 33-р байрны оршин суугчид: Анх автомашины шил сольдог жижигхэн газар байсан. Зуны цагт хагарсан автомашины шилээ ил задгай хаяснаас болж, хүүхэд бэртэж, гэмтэх тохиолдол гарч байсан. Гэтэл хөл хориог далимдуулан хоёр сарын өмнөөс уг өргөтгөл баригдсан. Үүнээс болж нэг, хоёр давхрын айлуудын үзэгдэх орчинг хязгаарлаж, тав тухгүй байдлыг үүсгэж байна.

Орон сууцны нийтийн эзэмшлийн газарт ингэж зөвшөөрөлгүй өргөтгөл барьж болохгүй байтал зөвшөөрөлтэй хэмээн иргэд бид нарт хэлсэн. Одоо хааяадаа автомашин засдаг юм уу маш их чимээ гаргадаг.

Оршин суугчдын тав тухгүй байдлыг алдагдуулсан, нийтийн эзэмшлийн газарт зөвшөөрөлгүй байгууламж барьсан энэ газарт арга хэмжээ авч өгөхийг холбогдох байгууллагуудаас хүсэж байна гэсэн юм.

---