Өмнөд Солонгосын Чанвон хот дор хаяж гурван хүүхэд төрүүлсэн хосуудад 100 сая воны буцалтгүй тусламж үзүүлэхээр болсон тухай орон нутгийн хэвлэлд мэдээлжээ.

2020 онд тус улсын хүн ам түүхэндээ анх удаа буурсан болохыг бид өмнө нь мэдээлсэн билээ. Тэгвэл Өмнөд Кёнсан мужийн төв Чанвон хотын удирдлагууд энэхүү асуудлын эсрэг санхүүгийн урамшуулал ашиглахаар шийджээ. Уг шинэ бодлогын хүрээнд тус хотод оршин суудаг бүх гэрлэсэн хосод 100 сая воны зээл олгох байна.

Хэрэв хосууд нэг хүүхэдтэй болбол зээлийн хүүгээс чөлөөлөгдөх аж. Харин хоёр хүүхэдтэй болбол зээлийн үндсэн хэмжээний 30 хувийг өршөөх бол гурван хүүхэдтэй болсон гэр бүлийн зээлийг бүхэлд нь тэглэн, буцалтгүй тусламж болгон өгөх гэнэ.

Чанвоны эрх баригчид тус хотын хүн амын тоо нэг саяас буурч магадгүй гэж санаа зовж байна. Орон нутгийн засаг захиргаа компаниудыг татах, ажилчид, их дээд сургуулийн оюутнуудын орон сууцанд хөнгөлөлт үзүүлэх замаар илүү олон ажлын байр бий болгохоор төлөвлөж байгаагаа мэдэгдсэн юм. Тэд 2025 он гэхэд 20 мянган шинэ ажлын байр бий болгохоор зорьж байгаа аж.

БНСУ-ын өндөр өрсөлдөөнтэй нийгэмд ажлын байрны хомсдол болон ажлын урт цаг зэрэг эдийн засгийн шалтгааны улмаас 20, 30, 40 насны иргэдийн дунд гэрлэлт, төрөлт харьцангуй бага байдаг бөгөөд энэ үзүүлэлт буурсаар байгаа юм.

Эх сурвалж: UPI

---