"LIVE" телевизээс бэлтгэн хүргэдэг "ХАЛУУН СЭДЭВ" ярилцлагын нэвтрүүлгийн өнөөдрийн дугаарт "Чингис хаан" банкны хохирогч О.Бямбадорж оролцлоо. Тэрбээр БСШУСЯ-ны захиалгаар орон нутагт сургуулийн барилгын ажил барьж олсон бүх мөнгөө "Чингис хаан" банкинд хадгалуулчихаад буцаан авч чадахгүй арван сар болж байгаа юм. 

"Чингис хаан" банкны хохирогч О.Бямбадорж:

-Би "Чингис хаан" банканд харилцах дансаа 2018 онд нээж байсан. Тус банканд БСШУСЯ-ны захиалгаар орон нутагт сургууль, цэцэрлэг барьж олсон орлогоо хийсэн биш авч чадахгүй жил гаран болж байна. Энэ банкнаас мөнгөө авахаар хөөцөлдөж явахдаа надаас гадна маш олон хүн, аж ахуйн нэгж мөнгөө авч чадахгүй байгааг олж мэдсэн. 

Биднийг хохироосон шалтгаан нөхцөлийг хайж байгаад МАН-ын бага хурлын гишүүнээр ажилладаг гурван хүнээс болж "Чингис хаан" банк доголдсоныг мэдлээ. Тус банкны хувьцаа эзэмшигч "Нью стандарт" ХХК-ийн Н.Батаа л гэхэд "Чингис хаан" банкнаас их хэмжээний зээл аваад Туул голын эрэгт "Хан хиллс" гэдэг өндөр үнэтэй орон сууц барьчихсан байна. Ш.Бүтэд гэх хувьцаа эзэмшигч нь мөн л олон тэрбум төгрөгийн зээл аваад түүнийгээ хөдөө аж ахуйн салбарт оруулчихсан гэж байна. Н.Баярсайхан буюу түүний хамаарал бүхий этгээд болон Буднямын Батхүү нар гэхэд 67 тэрбум төгрөгийг "Чингис хаан" банкнаас гаргуулж аваад бүр "Степп голд" гэдэг алтны уурхай авчихсан байж байх жишээтэй. 

Энэ асуудлыг шалгаж шийдвэрлэж өгөөч хэмээн Монголбанк, АТГ-т гомдол гаргасан боловч ямар нэгэн шийдвэртэй арга хэмжээ авахгүй нэг нэгэн рүүгээ шидэж өөрсдөөсөө холдуулаад байгаад гомдолтой байна.

---