Цар тахлын үеийн хөл хорионоос болж дахин нэг 10 настай охин амиа алдсан харамсалтай хэрэг гарлаа. Цус харвалттай 10 настай охин өнгөрсөн баасан гарагт буюу 11-р сарын 20-ны өглөө Сэлэнгэ аймгийн Баруунхараагаас 22-ын товчоон дээр иржээ. Гэвч "шинжилгээ авна", "эмч ирнэ" гэх мэтийн шалтаг, шалтгаан тоочсоор 22-ын товчооны цаана хүнд өвчтэй охиныг гурван цаг гаруй саатуулжээ.

Хүчилтөрөгч нь дуусахын даваан дээр ЭХЭМҮТ-өөс утасдаж, “Хүүхдээ өгч явуулаад өөрсдөө үлдэнэ гэвэл оруулна” хэмээн барьцаалсан байна.

Ингээд хүүхдийг нь эцэг эхээс нь салгаж ЭХЭМҮТ /тайлбар үз/ руу авч явахдаа коронавирусийн шинжилгээ авсан. Шинжилгээний хариу гартал хүүхдийг улаан тууз татсан, халдвартай гэсэн өрөөнд тусгаарлан хэдэн цаг болжээ. Ингээд охины хариу сөрөг гарч эмчилгээг хийж эхэлсэн байна. 

Харин энэ хооронд эцэг, эхийнх нь хариу гараагүй гэх шалтгаанаар охиныг эцэг, эхтэй нь уулзуулахгүй гурав хоносон байна. Ингээд гурав хоногийн дараа буюу даваа гарагт охины зүрх нь зогсож байх үед нь “Охины чинь зүрх зогсчихлоо, одоо ороорой” хэмээн хэлсэн талаар талиайгаач охины ээж ярилаа. Ингэхдээ охиныг эцэг эхтэй нь 10 минут л хамт байлгажээ...

Энэ бүх уй гашууг туулсан залуу эцэг, эх хөл хорио гэх “тэнэглэл”-ээс болж шокын байдалтайгаар охиныхоо шарилыг ачаад Баруунхараа /Баянгол сум/ руугаа буцсан байна...

---