Өнөөдөр Ардчилсан намын дүрмийг боловсруулах ажлын хэсгийнхэн тус намын удирдлагад шинэчлэн боловсруулсан дүрмийн төслөө гардууллаа.

УИХ-ын сонгуулийн дараа буюу 2020 оны наймдугаар сарын 13-ны өдөр Ардчилсан намын Үндэсний бодлогын хорооноос намын дүрмийг шинэчлэх ажлын хэсгийг нийт 44 хүний бүрэлдэхүүнтэй байгуулсан. Тус ажлын хэсэг дөрвөн сарын турш шинэчилсэн дүрмийн төсөлд дээр ажиллаж, дөрвөн бүсийн чуулган болон онлайн уулзалтуудаар намын гишүүд, дэмжигчдээсээ олон дахин санал авсны үндсэн дээр тус дүрмийн төслөө боловсруулсан байна.

Ажлын хэсгийн ахлагч О.Алтангэрэл шинэчлэн боловсруулсан дүрмийн төслөө АН-ын даргын үүрэг гүйцэтгэгч Ц.Туваан, ХЭГ-ын дарга П.Нүрзэд нарт гардуулах үеэрээ “Бид дөрвөн сарын хугацаанд 44 хүний бүрэлдэхүүнтэйгээр гишүүд, дэмжигчдийнхээ саналыг аван, нээлттэй хэлэлцүүлэн шинэчилсэн дүрмийн төслийг боловсрууллаа. Өнөөдөр намынхаа удирдлагуудад өргөн барьж байна. Тус дүрмийн төслийг их хурлаар хэлэлцүүлж өгнө үү” хэмээсэн юм.

Дүрмийн өөрчлөлтөд:

-Намын даргын эрх, хэмжээг багасгах,

-Намын анхан шатны нэгж, жирийн гишүүд, дэмжигчдийн эрх, оролцоог нэмэгдүүлэх,

-Намын даргын сунгааг улс орон даяар явуулахгүй бөгөөд нэр дэвшигчдээс хоёр хүнийг үлдээж, олонхийн саналаар тодруулах,

-Намын санхүүг шилэн болгох. Намын дарга санхүүтэй орооцолддог байдлыг зогсоох гэх мэтийн тодорхой зүйл, заалтууд тусгагджээ. 

Ардчилсан намын Үндсэн дүрмийн өөрчлөлтөө намын их хурлаараа баталдаг бөгөөд тус удахгүй намын их хурлыг товлож, хуралдуулахаар төлөвлөж байгаа ажээ. Үндсэн дүрмээ баталсны дараагаар намын шинэ даргын сунгааг явуулах юм байна. 

---