Хятадын  Шэнзэн хот дахь Шинжлэх ухаан, технологийн их сургуулийн профессор Хэ Жианкуй ХДХВ-т тэсвэртэй ДНК-г суулгасан ихэр охидыг эсэн мэнд өлгийдөж авснаа мэдэгдээд байна. Гэвч дэлхийн шинжлэх ухааны салбарын эрдэмтэд дэлхийн хамгийн анхны генийн өөрчлөлтөд орсон ихэр охидыг эсэргүүцэж, хурцаар шүүмжиллээ. Хятадын Засгийн газар уг мэдээллийн дагуу нягтлан шалгах ажлыг нэн даруй эхлүүлэхээр болжээ.

 

 

Профессор Хэ өөрийн лабораторидоо долоон үр хөврөлийн генийн кодыг өөрчилж эхийн хэвлийд суулгаснаас нэг нь амжилттай бойжиж хэдэн долоо хоногийн өмнө Лулу, Нана ихэр охид мэндэлсэн байна. Эрдэмтэн генийн кодыг өөрчлөхдөө CRISPR-cas 9 төхөөрөмжийг ашиглаж HIV буюу Хүний Дархлал Хомсдлын вирусыг нэвтрүүлэхгүй байх ДНК-г бүтээжээ.

 

 

Туршилтаа Шэнзэний Хүүхэд эмэгтэйчүүдийн эмнэлэгт явуулсан гэж мэдэгдсэн ч тус эмнэлгийн зүгээс ямар ч генийн туршилт явуулаагүй ба ихэр охид мэндэлсэн гэх мэдээллийг үгүйсгэж байна. Шэнзэний Шинжлэх ухаан, технологийн их сургуулийн удирдах албан тушаалтнууд профессор Хэ хоёрдугаар сарын нэгнээс хойш эзгүй байсан ба туршилт сургуулийн лабораториос хол болсон гэжээ.

 

 

Ирээдүйн хүн төрөлхтний генийг өөрчлөх туршилтыг эсэргүүцдэг олон эрдэмтэн бий. Энэ нь бидний ирээдүй хойч үед маш том хор хөнөөлтэй гэж үздэг учраас дэлхийн ихэнх орнуудад генийг нь өөрчилсөн үр хөврөлийг үргэлжлүүлэн бойжуулж, төрүүлэхийг хориглосон байдаг. Тухайлбал АНУ, Их Британи улсууд генийн өөрчлөлттэй үр хөврөлийг эсэн мэнд төрүүлэхийг хориглодог.

 

Эх сурвалж: www.cnn.com

---