Засгийн газар ээлжит хуралдаан болж, ямар шийдвэр гаргасан талаар Шадар сайд Я.Содбаатар, Эрчим хүчний сайд Н.Тавинбэх нар танилцууллаа.

ШАДАР САЙД Я.СОДБААТАР:

-Ирэх оны 04-р сарын 01 хүртэл сайжруулсан түлшний үнийг 50 хувь бууруулахаар боллоо. Мөн, эрсдэлтэй гэж үзэж буй найман бүс нутагт нэг сарын хугацаанд Засгийн газраас хяналтын баг гаргаж шалгахаар боллоо.

ХӨСҮТ-д шалгалт хийнэ. Эм эмнэлгийн хэрэгслийн халдвар хамгаалалт, хог хаягдлын устгал зэрэгт анхаарна. Тусгаарлах байруудыг мөн шалгана. Тусгаарлах байрнаас халдвар гарсан гэж үзэж байгаа. Улаанбаатар хотод л гэхэд л ойрын хавтлын 800 гаруй, дам хавьтлын 2000 гаруй хүнийг тусгаарлан шалгаж байна. Үүнтэй холбоотойгоор зарим тусгай нислэг үйлдэнэ.
Алтанбулагийн боомтыг шалгана. Боомтоор дамжиж халдвар орж ирсэн. Бусад Цагааннуур, Замын-Үүд, Шивээрхүрэн, Гашуунсухайт гэх мэт боомтуудыг ч мөн шалгана. Ажилтан албан хаагч, жолооч нарыг бүгдийг шинжилгээнд хамруулна.
Дараагийн эрсдэлтэй бүс Орхон аймагт мөн шалгалт, үзлэг хийнэ. Эхний ээлжинд Эрдэнэт үйлдвэрийн бүх ажилчдыг шинжилгээнд хамруулаад байна.

-Вакцины зардал төсөвт тусгагдсан уу. Хүн амын 60 хувь гэж хэнийг хамруулна гэсэн үг вэ?

-Вакцины асуудлаар Сангийн сайдаар ахлуулсан ажлын хэсэг ажиллаж байна. Өнөөдрийн байдлаар нэг ч вакцин бүрэн дүүрэн гараагүй байна. Өнөөдрийн байдлаар гурван вакцин яригдаж байна. Манай улсын хуулиар сайн дурын үндсэн дээр вакцинд хамрагдана. Бид зургаан үйлдвэрлэгчтэй харилцаж байна. ДЭМБ-ын санхүүжилтээр авахаар ярьж байна. Одоо туршигдаж буй вакцины аль нь ч хүүхдэд хийгдэхгүй.

-Сайжруулсан түлшний нөөц хангалттай юу?
-Сайжруулсан түлшний нөөц, хангамж хангалттай бий.

ЭРЧИМ ХҮЧНИЙ САЙД Н.ТАВИНБЭХ:

-Өдрийн хэрэгцээнд 2800 тонн сайжруулсан түлш нийлүүлж байна. Нөөц өдөр бүрийн хэрэглээнээс гадна 57 мянган тонн байна. Сарын хэрэгцээ 90 мянган тонн байдаг.

-Хувийн цэцэрлэгүүдэд хувьсах зардал өгөх үү?
-Боловсролын сайд эрх хүрээнийхээ хувьд мэдэх асуудал. Ажиллаагүй нөхцөлд хувьсах зардал өгөхгүй болов уу.

-Сайжруулсан түлшийг шуудайгаар нь авахад ч 50 хувь хөнгөлөх үү?

-Шуудайтай нүүрсний үнэ 50 хувь буурна. Цахилгааны үнэ нэмэгдээгүй. Нэмэгдэх шаардлага бий. Гэхдээ ойрын үед нэмэгдэхгүй.

Гурван тэрбум төгрөгийг төсвөөс гаргаж халдвар гарсан голомт, аймгуудад зарцуулна.

---