Эрүүл мэндийн яамнаас коронавирусийн тархалт, нөхцөл байдлын талаарх мэдээллийг өглөө.

ХӨСҮТ-ийн Тандалт, судалгааны албаны дарга А.Амбасэлмаа: "2020.11.25-ны өдөр ХӨСҮТ, ЗӨСҮТ, Сэлэнгэ, Дархан, Орхон, лабораториудад 4,176 хүнд PCR шинжилгээ хийхэд улсын хэмжээнд нийт 13 тохиолдол нэмж бүртгэгдлээ.

Улаанбаатарт гурван шинэ тохиолдол бүртгэгдсэн нь өмнөх батлагдсан тохиолдлуудын хавьтал болсон хүмүүс юм. Сэлэнгэд дөрвөн тохиолдол нэмэгдсэн нь мөн хавьтлын хүрээнээс илэрсэн. Дархан-Уул аймагт хоёр, Орхон аймагт дөрвөн тохиолдол шинээр нэмэгдлээ.

24 цагийн хугацаанд Говьсүмбэр, Дорноговь аймагт халдварын тохиолдол нэмэгдээгүй.

Дотоодод нийт батлагдсан тохиолдол 275 боллоо:

• Улаанбаатарт 63
• Дархан-Уул 22
• Дорноговь 18
• Орхон 21
• Говьсүмбэр 3
• Сэлэнгэ аймагт 148 байна.

Монгол Улсад бүртгэгдсэн нийт тохиолдлын тоо 712 боллоо. Нийт батлагдсан тохиолдлуудаас 345 хүн одоогоор эдгэрээд байгаа. ХӨСҮТ болон Цэргийн төв эмнэлэгт 360 хүн эмчлэгдэж байна. Биеийн байдлыг үнэлбэл, нэг хүний биеийн байдал нэн хүнд, хүнд гурав, хүндэвтэр 55, хөнгөн 301 хүн байгаа. 

Өнөөдрийн байдлаар нийслэлийн долоон дүүрэгт халдварын тохиолдол бүртгэгдсэн бөгөөд хамгийн их нь Баянзүрх болон Баянгол дүүрэгт байна. 

Бүртгэгдсэн халдварыг дүүрэг, хороогоор нь харуулбал, 

• Баянгол дүүргийн 1,3,4,6,7,9,10,18 дугаар хороо-16
• Баянзүрх дүүргийн 4,10 дугаар хороо-17
• Сүхбаатар дүүргийн 12,13,16,18 дугаар хороо-11
• Сонгинхайрхан дүүргийн 7,16,19 дүгээр хороо-10
• Хан-Уул дүүргийн 10,16,21 дүгээр хороо-7
• Чингэлтэй дүүргий 19 дүгээр хороонд -1
• Багануур дүүргийн 4 дүгээр хороонд тус тус 1 тохиолдол илэрчээ.

Улаанбаатарт бүртгэгдсэн эхний тохиолдлын хавьтал 52 хүн өвчилсөн бөгөөд есөн байршилд халдвар гарсан байгаа. Төмөр замын гурван байршилд 11 хүн өвчилсөн байна.

Гэр бүлээсээ халдвар авсан 12 гэр бүл байгаа. Гэр бүлийн хувьд халдварын эрчим маш өндөр 52 хувьтай байна. Мөн гэртээ хүн урьж бариа засал хийлгэдэг явдал манайд байгаа бөгөөд халдварын 23.1 хувь нь үүнээс үүдэлтэй тархсан. Караокетой холбоотой 20 хувь, буяны ажил, төрсөн өдөр, бие биенийхээрээ айлчилж зочилсонтой холбоотой 3-6 хувь, тоглолт үзсэнтэй холбоотой 2 хувь, орцны хавьтал 2.9 хувь бүртгэгдсэн байна.

Төмөр замын голомтын хувьд гэр бүлийн гишүүдэд халдварлах эрчим 26.7 хувьтай, ажилчдын дунд халдварлах нь 3 хувь, эмнэлгийн ажилчид 5 хувийг тус тус эзэлж байна" гэдгийг хэллээ.

---