Ерөнхийлөгч Дональд Трамп эрх мэдлээ шилжүүлэн өгөхөө хүлээн зөвшөөрсний дараа олон улсын эх сурвалжууд шинээр сонгогдсон Ерөнхийлөгч Жо Байден багаа хэрхэн бүрдүүлснийг сонирхож эхэллээ.

Хамгийн их анхаарал татсан сонголт нь АНУ-ын Төрийн нарийн бичгийн дарга асан Жон Керрийг багтаа оруулсан явдал байлаа. Барак Обамаг Ерөнхийлөгчөөр ажиллах хугацаанд буюу 2013-2017 оны хооронд АНУ-ын 68 дахь Төрийн нарийн бичгийн даргын албыг нэр төртэйгээр хашсан Жон Керрийг Жо Байден энэ удаад цаг уурын өөрчлөлтийн тусгай элч төлөөлөгчөөр сонгосон байна.

Жон Керри Төрийн нарийн бичигийн дарга байхдаа АНУ-ыг төлөөлөн 2016 онд Парисын цаг уурын хэлэлцээрт гарын үсэг зурсан ч Трампын үед Америк уг хэлэлцээрээс нэрээ татсан анхны улс болсон. Гэсэн ч Байден хэлэлцээрт эргэн нэгдэхээ сонгуулийн өмнөх кампанит ажлынхаа үеэр мэдэгдэж байсанчлан энэ чухал үүрэг даалгаврыг Жон Керрид найдаж даалгажээ.

Харин Байден Ерөнхийлөгчийн тангаргаа өргөсний дараа Төрийн нарийн бичгийн даргын албыг удаан хугацаанд түүний туслахаар ажилласан Энтони Блинкен хүлээлгэн өгөхөөр болжээ. Сангийн сайдын үүргийг Холбооны нөөцийн сангийн дарга байсан Жэнет Иеллен гүйцэтгэх юм байна.

Одоо мэдэгдэж байгаагаар Жо Байден сонгуулийн 306 коллегийн санал авч ялсан бол Трамп 232 саналаар ялагдаж байгаа юм. Ирэх сарын 14-ний өдөр сонгуулийн коллегийн дүнг албан ёсоор баталгаажуулна.

Түүнчлэн Байдены баг Үндэсний тагнуулын албаны даргаар анх удаа эмэгтэй хүн сонгосон болон Дотоодын аюулгүй байдлыг хамгаалах яамны сайдаар анх удаа латин гаралтай улс төрчийг томилох гэж байгаагаар онцлог болж байна. Үндэсний тагнуулын албаны даргын үүргийг Тагнуулын төв газрын дэд дарга, үндэсний аюулгүй байдлын зөвлөхөөр ажиллаж байсан хатагтай Эврил Хайнес гүйцэтгэхээр Байдены багт нэгджээ. Харин Алехандро Майоркас Дотоодын аюулгүй байдлыг хамгаалах яамны сайдад нэр нь тодорсон байна.

Бусад тодорхой болоод буй томилгоог сонирхуулахад Цагаан ордны үндэсний аюулгүй байдлын зөвлөхөөр Жэк Сулливан, НҮБ-д суух онц бөгөөд бүрэн эрхт элчин сайдаар Линда Томас Грийнфиелд нэрлэгджээ.

Эх сурвалж: ВВС

---