Засгийн газар, УОК, НЗДТГ өөр өөрсдийн бодож олсон шийдвэрийг гаргаж, нэгнийгээ үгүйсгэж, өнөөдөр тогтоосноо маргааш өөрчилж байгаагаас иргэдэд ойлгомжгүй, тодорхойгүй байдал үүсэж, бухимдал дээд цэгтээ хүрээд байна.

Дэлхийн улс орны Засгийн газрууд иргэд рүүгээ чиглэсэн тушаал, шийдвэр гаргаж байна. Иргэд – хамгийн нэгдүгээрт. Иргэдийн нэн шаардлагатай хэрэгцээг аль болох тасалдуулахгүйгээр тусгаарлаж, эрүүл аж төрөх бодлогыг авч хэрэгжүүлж байна.

Харин манайд иргэн лав нэгдүгээр тавигдахгүй байна. Тавигдахгүй байгаа нь иргэдийн бухимдлаар илэрч байна. Хэвлэл мэдээллийн байгууллагуудын утас сүүлийн хэдэн өдөрт шатаж байна.

Дэлхийн 220 гаруй орон арван сарын турш коронавирустэй үзэлцэж, арвин их туршлага хуримтлуулж, хоёр дахь давлагаагаа даван туулж байна. Дотооддоо алдаад байгаа бидний хувьд юу хийх вэ гэхээсээ илүү дээрх улс орнуудын туршлагыг хуулахад болмоор. Дугуйг шинээр хийх ямар ч утгагүй шүү дээ.

Гадаадын улс орнуудын туршлагын талаар ярихаар манайхан “Наадах чинь манайд тохирохгүй. Захирамж төдий гаргахаар гудамж талбайгаараа бэлчинэ” гэж хэлэх байх. Манайхан бэлчихгүй ээ, яс юман дээрээ монголчууд шиг аминдаа хайртай хүмүүс байхгүй.

Хэрэв үнэхээр тэгж бэлчинэ гэж бодоод байгаа бол цахим гав, байршил тогтоогч апп утсандаа суулгахыг үүрэгд. Эсвэл Энэтхэг шиг уртхан саваа олж аваад холоос шавхуурд. Тэрнээс цагдаагаа өвдөглөж дараад гавла гэж үүрэгдэж болохгүй шүү дээ. Энэ айхтар вирус 2м дотор халддаг!.

Цагдаа, хүчний байгууллагаар иргэдээ цагдуулна гэдэг бол хамгийн арга ядарсан арга. Цагдаа ч гэсэн хүн. Цагдаад вирус наалддаггүй гэж ДЭМБ-ын зөвлөх зөвлөсөн хэрэг үү.

Ингээд та бүхэндээ гадаадад ажиллаж, амьдардаг монголчуудын туршлагыг нэгтгэн зах зухаас нь хүргэж байна. Энэ бол хөтөлбөргүй сургааль биш. Авахыг нь аваад, өөрчлөхийг нь өөрчлөхийг УОК чармайх хэрэгтэй.

Гагцхүү арван сарын туршлага гэдгийг үл умартан, ноён нурууг нь хадгалах хэрэгтэй. Тэрнээс өөрсдөө дугуй шинээр зохион бүтээхээр улайраад юуг ч өөрчилж чадахгүй. Баахан хүн хүч, хөрөнгө мөнгө үрэгдэнэ. Эцэст нь, халдвар тархана.

 

---