Эрүүл мэндийн яамнаас коронавирусийн халдварын нөхцөл байдлын мэдээллийг өдөр бүр 11:00, 17:00 цагаас мэдээлж байхаар болсон. Энэ дагуу 2020 оны 11-р сарын 17-ны өдрийн 11:00 цагийн мэдээллээ хүргэж байна.

ЭМЯ-ны Нийгмийн эрүүл мэндийн газрын дарга Д.Нарангэрэл "Дэлхийн нийтэд 54.3 сая хүн өвчилжээ. ОХУ-д 24 цагийн хугацаанд 22 мянган хүн шинээр халдвар авсан байна. Манай улстай хил залгаа Чит, Алтайн хязгаарт халдвар нэмэгдэж байгаа бөгөөд Буриадад халдвар нэмэгдсэн тул хатуу хөл хорио тогтоосон. Манай улсад бүртгэгдсэн тохиолдол 434 боллоо" гэв.

ХӨСҮТ-ийн Тандалт судалгааны албаны дарга А.Амбасэлмаа: Энэ сарын 16-нд нийт 1762 хүнд шинжилгээ хийхэд гурван хүнд халдвар нэмж илэрснээр нийт халдварын тоо 434 боллоо.

Улаанбаатар хотод бүртгэгдсэн кластер халдварын ойрын хавьтал 45 хүнд хийсэн гурав дахь шинжилгээгээр Д-гийн ахын шинжилгээ эерэг гарсан. Д-гийн ойрын хавьтлын хүмүүс ХӨСҮТ-д тусгаарлагдаж байсан.

Энэ сарын 16-нд Сэлэнгэ аймгийн Алтанбулаг боомтоор орж ирсэн хоёр тээврийн жолоочоос халдвар илэрсэн. Нэг нь ОХУ-ын иргэн байсан бөгөөд өөрийнх нь хүсэлтээр нутаг буцаасан. Халдвар илэрсэн нэг жолоочийг ХӨСҮТ-д авчирч эмчилгээ хийж байна.

Хэнтий аймгийн 10 иргэний шинжилгээний хариу сөрөг гарсан. Дархан-Уул аймагт 132 иргэний сорьцод шинжилгээ хийхэд нэг сэжигтэй тохиолдол илэрсэн тухайн иргэний сорьцыг дахин давтан шинжилгээ хийж, батлагдвал олон нийтэд мэдээлэл хүргэнэ.

Улаанбаатар хотод коронавирусийн нийт 10 тохиолдол батлагдаад байгаа. Ойрын хавьтлыг 2-3 хоногт дахин дахин шинжилгээ хийж байна. Ингээд ахаас нь гурав дахь давтан шинжилгээгээр халдвар илэрсэн. Эдгээр тохиолдлын ойрын болон хоёрдогч хавьтлын 5600 гаруй хүн байна. Дээрх иргэдээс 3000 гаруй хүнийг шинжилгээнд хамруулахад сөрөг гарсан.

Сэлэнгэ аймгийн нийт дөрвөн иргэнээс халдвар илрээд байгаа. Ойрын хавьтлын 19 хүнийн түргэвчилсэн тест эерэг гарсан. Эдгээр иргэдээс сорьц авч PCR баталгаажуулна.

Манай улсад коронавирусийн нийт батлагдсан тохиолдол 434 болж, 328 иргэн эдгэрээд байна. Өөрийн хүсэлтээр зургаан иргэн нутаг буцсан. ХӨСҮТ-д нийт 171 иргэн ажиглалтад, тандалтад байгаас хоёр иргэний биеийн байдал хүнд, 21 хүний биеийн байдал хүндэвтэр байгаа юм. Өнөөдрийн байдлаар 100 мянган оношлуурыг аймаг, орон нутагт тараажээ.

---