Туркменистан улсын Ерөнхийлөгч Гурбангулы Бердымухамедов өөрийн дуртай нохойны үүлдрийг алдаршуулж, аварга том алтан хөшөө босгожээ. Улсын нийслэл Ашгабат хотод алабай буюу төв Азийн хоньчин нохойн зургаан метр өндөр алтаар урласан хөшөө сүндэрлэж, нээлтээ хийсэн байна.

Уг үүлдрийн нохой нь үндэсний үнэт өв соёлд тооцогддог. Тулааны төдийгүй харуулын нохойны хамгийн эртний үүлдэр гэж үздэг бөгөөд 2,000 жилийн өмнөөс үүсэлтэй ажээ. Ерөнхийлөгч Гурбангулы үндэсний өв соёлд бүртгэлтэй алабай үүлдрийн нохойг алдаршуулсан анхны шийдвэр энэ биш юм. Өнгөрсөн жил хоньчин нохойд зориулан ном гаргажээ.

Хэдийгээр зургаан метр өндөр алтан нохойн хөшөө сүр жавхлантай харагдаж байгаа ч Туркменистаны хүн амын ихэнх нь ядуу буурай амьдарч байна. Ашгийн бус, төрийн бус хэвлэл мэдээллийн RSF байгууллагын мэдээлснээр тус улс хэвлэлийн эрх чөлөө хамгийн хязгаарлагдмал гурван улсын нэг буюу Умард Солонгосын дараа хоёрдугаарт ордог.

Алтан нохойны хөшөө ямар өртөг зардлаар бүтсэн нь тодорхойгүй байгаа юм. Ерөнхийлөгч Бердымухамедов нутгийн ахал теке үүлдрийн морьдод тун хайртай бөгөөд 2015 онд уг морийг унаж буй алтан хөшөөгөө мөн бариулж байжээ.

Тэрээр нохой, моринд тун дуртай нэгэн тул нөхөрсөг харилцаатай Узбекстаны Ерөнхийлөгч Ислам Каримов, Оросын төрийн тэргүүн Владимир Путин, Катарын эмир зэрэг хүмүүст морь, гөлөг бэлэглэсэн тохиолдлууд олон байдаг.

Эх сурвалж: ВВС

---