Анх манай улсад хөл хорио тогтоосон нэгдүгээр сарын сүүлээр амны хаалтын эрэлт огцом өсөж, үнийн хөөргөдөл үүсээд байсан. Гэтэл өчигдөр шөнө УОК-оос гаргасан гурав хоног хөл хорио тогтоох шийдвэртэй холбогдуулан иргэдийн дунд дахин амны хаалтын эрэлт ихсэж, нэг удаагийн амны хаалтын үнэ 500-800 төгрөгөөр нэмэгдсэн байна. Үүнтэй холбоотой хангамж хүрэлцээ, үнэ ханшийн талаар бид өнөөдөр сурвалжиллаа.

Хэдхэн хоногийн өмнө 200-300 төгрөгийн үнэтэй зарагдаж байсан амны хаалт өнөөдөр эмийн сангуудаар бөөний үнэ нь 500-800 төгрөгийн үнэтэй зарагдаж байгаа юм. Мөн иргэд өөрт хамгийн ойр байрлах хүнсний дэлгүүр, худалдааны төвөөс амны хаалтыг 800-1000 төгрөгөөр худалдан авч байна.

Хөл хорио тогтоосонтой холбоотойгоор зохиомол хомсдол бий болгож, үнийн хөөрөгдөл үүсгэсэн аж ахуйн нэгжид хатуу арга хэмжээ авна гэдгийг Шударга өрсөлдөөн хэрэглэгчийн төлөө газраас мэдээллээ.

---