Нийтэлсэн:   Admin

4 жилийн өмнө

МҮОНРТВ-ийн үйлдвэрчний эвлэл, уран бүтээлчдийн төлөөлөл өнөөдөр ард иргэддээ хандан мэдээлэл хийлээ.

Сэтгүүлч Б.Пүрэв:

Ялсан намын томилгоогоор ирсэн удирдлагууд биднийг маш их хавчин дарамталж, үгээрээ байлгахыг оролддог явдал хэрээс хэтэрсэн. Бид чадвар муутай Үндэсний зөвлөл, Захирлуудын зөвлөлийг бүрэн бүрэлдэхүүнээр нь огцруулж, шинэ захирлын томилгоог олон нийтэд нээлттэй байдлаар томилуулах шаардлагыг төрийн гурван өндөрлөгт хүргүүлсэн. Ерөнхий захирлын сонгон шалгаруулалтын зарыг нээлттэй зарладаг атлаа яг сонголт хийхдээ хаалттай явагддаг нь эргэлзээ төрүүлж байна.

МУСГЗ Ш.Гүрбазар:

Би 53 жилийн түүхтэй МҮОНТВ-д 43 жил ажилласан хүн. Өнөөдрийн энэ асуудалд албан тушаал горилсондоо оролцож байгаа юм биш. Би 40 жил ажилласан энэ байгууллагадаа санаа зовохгүй байж чаддаггүй. МҮОНТВ-ийн Үндэсний зөвлөлийг өнөөдөр ярих ёстой. Ийм байдлаар удаан явж болохгүй. Хуулийг нь өөрчлөх ёстой. МҮОНТВ хэдий болтол ялсан намын үгээр явах ёстой юм. Би “Та хариулахгүй байж” болно нэвтрүүлгийг хийснийхээ төлөө зочин урьсныхаа төлөө ялсан намын удирдлагуудад зануулж, ажлаас халагдахдаа тулж байсан. Монголын ард түмэн яагаад татвар хураамж өгдөг вэ гэхээр хэрэгтэй цагт, хэрэгтэй үед, хэрэгтэй мэдээллийг өгч байгаарай гэж ард түмэн биднийг санхүүжүүлдэг. МҮОНТВ-ийн нийтлэлийн бодлого сүүлийн таван жилд бүрэн алдагдсан.

1990 онд дээр доороос хүчтэй шахалттай, хатуу хяналттай цаг үед бид ардчилсан хувьсгалыг сурвалжлан хүргэж, нийт ард иргэдийнхээ эрх ашгийн өмнө дуу хоолойгоо хүргэж чаддаг байсан. Одоо тийм хэмжээний хувьсгал боллоо гэхэд МҮОНТВ ажиллаж чадахгүй шүү. Юу хийх нь, яах нь тодорхойгүй том байшин байгаад байж болохгүй. Энэ байгууллагын ирээдүйг харахаар, бодохоор зүгээр суугаад байж болохгүй байна. Тиймээс энэ асуудалд УИХ, Байнгын хороо онцгой анхаарч асуудлыг шийдэхгүй бол болохгүй байна.

Сурталчилгаа