ОХУ шинэ коронавирусийн эсрэг вакцинаа гадаадын жуулчдад төлбөртэйгөөр санал болгохыг огт бодолцож үзэхгүй байгаа гэдгийг тус улсын Эрүүл мэндийн сайдын туслах Алексей Кузнецов мэдэгджээ. Тэрээр "ТАСС" агентлагт өгсөн ярилцлагадаа Оросын иргэдийг нэн тэргүүнд вакцинжуулна гэж хэлсэн байна.

Сүүлийн үед зарим улсын аялал жуулчлалын агентлагууд ОХУ-д очиж, "коронавирусийн эсрэг вакцин хийлгэх аялал"-ыг санал болгох болсон гэж хэвлэл мэдээллийн хэрэгслүүд мэдээлэх болжээ. Тэгвэл Кузнецов үүний хариуд "Энэ бол ердийн залилан. Бид коронавирусийн арилжааны вакциныг огт бодолцож үзэхгүй байгаа, тэр тусмаа гадаадын жуулчдад. Вакцинжуулалт хэдийнэ эхэлсэн бөгөөд иргэдэд үнэ төлбөргүй хийгдэж байгаа. Оросуудыг вакцинжуулах нь бидний нэн тэргүүний үүрэг" хэмээн тэмдэглэжээ.

Тэрээр мөн "Арилжааны вакцины хангамжийн аливаа хэлбэрийг дотоодын хэрэгцээг хангасны дараа л хэлэлцэж болно" гэж нэмж хэлсэн юм.

Чехийн телевизийн мэдээлснээр орон нутгийн нэгэн бизнес эрхлэгч ОХУ-ын "Спутник-V" вакциныг хийлгэх хүсэлтэй хүмүүст зориулж ОХУ руу аялах хөтөлбөрийг санал болгож байгаа аж. Тэрээр энэхүү вакцинжуулалтын аяллыг 1,370 орчим ам.долларын үнээр санал болгож байгаа гэнэ.

Одоогоор Тусгаар улсуудын хамтын нөхөрлөл, Европ, Ази, Ойрх Дорнод, Латин Америкийн 50 гаруй улс "Спутник-V" вакциныг авах хүсэлт гаргаад байгаа аж. ОХУ-ын Шууд хөрөнгө оруулалтын сангаас өгсөн мэдээллийн дагуу тус улс Мексикт 32 сая тун, Бразилд 50 сая тун, Энэтхэгт 100 сая тун, Узбекистанд 35 сая тун, Непалд 25 сая тун тус тус нийлүүлэх гэрээг хийгээд байгаа юм.

Эх сурвалж: TASS

---