Засгийн газрын өчигдрийн хуралдаанаар Оюутолгой компанийн ТУЗ-д монгол талыг төлөөлөх хоёр гишүүнийг шинээр томилсон. Ингэхдээ Монгол Улсын Ерөнхийлөгч асан Н.Багабандийг ТУЗ-ийн гишүүн хэвээр үлдээсэн юм.

Гэвч Оюутолгой компанийн ТУЗ-д шинээр томилогдсон З.Ган-Очирыг уул уурхайн бизнес эрхэлдэг УИХ-ын гишүүний шахааны хүн байж болзошгүй гэх хардлага байгаа юм.  

Тухайлбал, Оюутолгой компанийн ТУЗ-д шинээр томилогдсон хоёр хүний нэг болох З.ГанОчир  “Аспайр майнинг” компанийн гүйцэтгэх захирлаар ажиллаж байсан аж. Австралийн хөрөнгө оруулалттай “Аспайр майнинг” компанийн 40 гаруй хувийг УИХ-ын гишүүн Ц.Цэрэнпунцаг эзэмшдэг бөгөөд З.Ган-Очирын хувьд “Аспайр майнинг” компанийн хамаарал бүхий хэд хэдэн охин компанийн захирал, үүсгэн байгуулагч, хувьцаа эзэмшигчээр бүртгэлтэй байдаг юм.

Эндээс үндэслэн УИХ-ын гишүүн Ц.Цэрэнпунцаг Оюутолгойн ТУЗ-д өөрийн хүнээ орууллаа гэх хардлага үүсээд байна. “Аспайр майнинг” компани Монгол Улсад 10 гаруй нүүрсний лиценз эзэмшдэг бөгөөд тэр дундаа Хөвсгөл аймагт “Овоотын орд”-д лиценз эзэмшиж, нүүрс зөөх төмөр зам барих гэж байгаа нь нутгийн иргэдийн эсэргүүцэлтэй тулгарч байсан.

---