2021 оны төсөвт ЖДҮГ-т шинээр ямар ч мөнгө төсөвлөөгүй. Санд төвлөрөх ёстой 500 гаруй тэрбумаасаа зээлээ олгох ёстой гэж Сангийн сайд мэдэгдсэн юм. Гэвч ЖДҮГ-т одоогоор дөнгөж 18 орчим тэрбум төгрөг төвлөрсөн бөгөөд Засгийн газарт төлөх 44 тэрбумын өрөө төлбөл ямар ч зээл гаргах боломжгүй нөхцөлд хүрээд байгаа ажээ. Энэ талаар ЖДҮГ-ийн дарга Я.Эрдэнэсайханаас тодрууллаа.

Тэрбээр “ЖДҮГ нь 2020 оны наймдугаар сарын 12-ны Засгийн газрын хуралдаанаар байгуулагдсан. Хоёр сарын хугацаанд өр төлбөрийг барагдуулах талаар хуулийн байгууллага, зээлдэгч нарт нэлээдгүй хандаж ажиллаа. Цаашлаад прокурорын байгууллагатай хамтран ажиллах талаар бичиг өгсөн. Прокурорын байгууллагад 40-50 зээлдэгчтэй холбоотой мэдээлэл өгсөн байгаа. Сан байгуулагдснаас хойш төвлөрүүлсэн төсөв 688 тэрбум төгрөг байдаг юм. Эргэн төлөлтөөсөө төвлөрүүлсэн мөнгөө бондын төлбөрт төлөөд явж байгаа. Хөгжлийн банкны 200 гаруй тэрбум төгрөгийг хүүтэй нь төлчихсөн. Засгийн газрын бонд дээр 44 тэрбум төгрөг дутуу байгаа. Эндээс 41 тэрбум төгрөгийг ирэх онд төвлөрүүлнэ.

Ямартай ч авсан мөнгөө буцаагаад өгөөд явж байгаа. Таван жилийн хугацаанд сан дээр 270 орчим төгрөгийг төвлөрүүлэх ёстой. Ирэх жил гэрээний дагуу аж ахуйн нэгжүүд 34 тэрбум төгрөгийн зээл төлөхөөр байгаа. Өнөөдрийн байдлаар 18 тэрбум төгрөг сангийн дансанд төвлөрсөн.

Зээл хүссэн хэчнээн аж ахуйн нэгж байгаа вэ?

-2020 онд 1579 аж ахуйн нэгж 238 тэрбум төгрөгийн зээл хүссэн. Энэ жил төвлөрсөн 18 тэрбум төгрөгийг зээл хүссэн аж ахуйн нэгжид өгнө гэвэл 15-16 нэгжийн нэг нь зээл авах боломж бүрдэж байгаа. 2021 оны улсын төсөвт 100 тэрбум төгрөг төсөвлөх юм бол Засгийн газрын 44 тэрбум төгрөгийн зээлээ дарж, үлдсэн мөнгийг аж ахуйн нэгжүүддээ зээл олгохоор саналаа явуулсан. Засгаас УИХ-д яаж шийдэгдсэн нь мэдэхгүй байна.

---